Barcelona y Castellón van acoyer el Día de les Lletres nel Esterior

El Conseyu de Comunidaes Asturianes va celebrar el Día de les Lletres Asturianes nel Esterior los díes 22 y 23 de mayu, en centros asturianos de Castellón y Barcelona.

 El Conseyu organiza esta actividá en colaboración con la Direición Xeneral de Política Lingüística y la Academia de la Llingua. Les tres entidaes tán yá trabayando na ellaboración del programa a desendolcar.
 
El Día de les Lletres nel Esterior vien celebrándose tolos años alternando añalmente centros asturianos d'España, restu d'Europa y América, como sedes oficiales. N'España, foi la primer celebración en 2001 en Les Palmes, siendo tamién sedes les ciudaes de Logroño, nel 2004, y Madrid, nel 2007. N'América, s'elixeron Montevideo nel 2002, Bonos Aires, nel 2005, y Chile nel 2008. En cuanto a los centros d'Europa, fueron sede del Día de les Lletres, París nel 2003, Liexa nel 2006 y les ciudaes suizes de Lausanne y Berna l’añu pasáu.