Xixón celebra’l Día Internacional del Idioma Maternu

La Oficina de la Llingua de Xixón va celebrar el Día Internacional del Idioma Maternu nel IES Padre Feijoo, con esposiciones, llectures y un karaoke multillingüísticu.

La cita ye nesi centru escolar, con aula d'acoyida llingüística, el llunes 22 a les 12.30 hores. Ye’l setu añu consecutivu que s'entama la celebración “col envís de dar a conocer la importancia de  les llingües y la diversidá cultural ente la xente mozo al tiempu que camienten sobre'l papel qu'ellos puen cumplir nel respetu y espardimientu de les llingües, entamando pola propia, l'asturianu”.
 
L'alumnáu van  lleer una frase nes distintes llingües qu'hai nel institutu, visitarán tamién la esposición del llibru “¿Qué ye la inmigración?”, con testos de Pablo Antón Marín Estrada y dibuxos de Pablo Amargo y fadrán un karaoke multillingüísticu col xuegu "Cómo nos canta la Llingua".
 
Nel actu tarán presentes Jorge Espina Díaz, en representación de la  Conceyalía de Cooperación, Cultura Asturiana y Política Llingüística, la Responsable de la Oficina Municipal de la Llingua, Mª Xosé Rodríguez López, el direutor del institutu, Chema Castiello, amás de delles maestres del centru escolar.
 
La Oficina Municipal de la Llingua editó tamién unes fiches didáutiques pa repartir ente tolos neños del centru educativu nel qu'apaez un testu en distintes llingües (alemán, árabe, aragonés, aranés, asturianu, bretón, castellanu, catalán, chinu, eonaviegu, eslovenu, vascu, francés, galés, gallegu, griegu, inglés, italianu, polacu, portugués, premanese, romanó, rumanu, rusu y serbiu) y delles actividaes y pasatiempos al rodiu de les llingües del mundu.