El Ferreiro va presentar una querella contra la conseyera por inxuries

José Naveiras, más conocíu como Pepe El Ferreiro va presentar una querella criminal por inxuries y calumnies contra la conseyera de Cultura, Mercedes Álvarez.

Considera que les manifestaciones realizaes el pasáu llunes na Xunta Xeneral "son falses, constitúin un delitu y redunden nel descreitu del antiguu direutor del Muséu Etnográficu de Grandas de Salime".
 
Tres una rueda de prensa celebrada en Grandas de Salime, el lletráu de Pepe El Ferreiro, Pelayo Mijares, esplicó que tán analizando l'acta de la comparecencia nel Parlamentu de la responsable antes de llegar a la vía penal.
  
De momentu, van proponer una conciliación que brinda a Álvarez la posibilidá de desdicise de les afirmaciones feches nel Parlamentu, pente medies d'una nueva comparecencia pública o ante los tribunales. "Si nun comparez vamos entamar la vía penal", anunció.
 
Despidu nulu o improcedente
  
Coles mesmes, señaló que presentaron una reclamación al Consorciu del Muséu contra la decisión de la Conseyería de Cultura de cesalu pa que'l despidu se considere nulu o, nel so defectu, improcedente. Nesti sen, Mijares consideró que se vulneraron drechos fundamentales y nun se siguió'l procedimientu correutu, dao que "nin les sos funciones, nin el so contratu yeren d'alta direición, sinón d'encargáu del muséu". Si la reclamación nun se resuelve, a últimos del próximu mes de marzu, van presentar una demanda ante'l Xulgáu de lo Social.
  
Nesta mesma llinia, estudien la posibilidá d'impugnar el nomamientu del nuevu direutor del Muséu porque "nun hubo procesu de selección". Pa El Ferreiro, el nomamientu del so sucesor, Francisco Cuesta Toribio, "taba decidíu enantes del so cese". Poro, van presentar una reclamación dirixida al Consorciu y a la conseyera, como pasu previu a la vía contencioso-alministrativa.
 
Una chaqueta vieya y un par de boines
  
A lo último, van lluchar porque se reconoza xudicialmente la propiedá de Pepe El Ferreiro de munchos de los bienes qu'integren los fondos del muséu. Nesti sen, Mijares llamentó que "cuando Pepe foi ayeri a recoyer los sos oxetos personales tres persones de la Conseyería torgáron-y sacar los sos llibros, documentos y axendes y namás-y dexaron recoyer una chaqueta vieya y un par de boines".
  
Esclaró, sicasí, qu'en cuantes se reconoza la propiedá, la intención del que fuere direutor mientres delles décades ye donalu too al Muséu "pa nun perxudicar al que foi'l so trabayu mientres trenta años".