El parlamentu gallegu encamienta a los cargos públicos l'usu del gallegu

Los grupos del parlamentu gallegu decidieron por unanimidá encamentar a la Xunta que ponga en conocencia de los cargos públicos la necesidá d'usu públicu del gallegu.

Esti acuerdu parte d'una proposición non de llei defendida pol voceru de Llingua del BNG, Bieito Lobeira, na Comisión Institucional, d'Alministración Xeral, Xusticia y Interior. El nacionalista llamó l'atención sobre los "incumplimientos de la llei y la vulneración de consensos de destacaos miembros del Gobiernu autonómicu, que nun falen en gallegu porque nun quieren".

"Trátase d'un despreciu a la llingua gallega pa prestar al públicu ultra, señaló, "en recordando que'l Plan Xeral de Normalización Lingüística (PXNL), aprobáu por tolos grupos, recueye la necesidá de que los cargos de l'Alministración autonómica esprésense nel idioma de la comunidá".
  
Con él coincidió'l diputáu del PSdeG José Manuel Lage Tuñas, que consideró "incomprensible que los cargos públicos nun utilicen la llingua de Galicia ensin prexuiciu de qu'empleguen la so llibertá individual pa espresase nel idioma que prefieran nel so ámbitu priváu". En cualquier casu, antemanándose a acusaciones d'intentu d'imposición, razonó que "nun s'impon lo que ye propio" y atribuyó esti argumentu "al complexu d'algunos".
  
"El país va avanzar cuando se supere esti alderique", caltuvo, "en señalando qu'aldericar nel Parlamentu esta cuestión ye indicativo de qu'hai un problema". Por ello, apostó por "llograr un gran acuerdu sobre llingua y superar asina "l'ataque desaforáu" que la Xunta ta cometiendo contra'l gallegu d'una manera tan evidente.
  
Pela so parte, el representante del PP nesti alderique, Agustín Baamonde, reconoció "la obligación de los poderes públicos de promover l'usu normalizáu del gallegu nel so llabor como referentes pa la sociedá". Sicasí, "refugó facer d'esta cuestión una norma d'obligáu cumplimientu cuando, al so xuiciu, trátase d'un criteriu xeneral".
 
El gallegu "inútil"
 
Nos cargos públicos como referentes pa la sociedá abondaron los voceros de los tres grupos. Por esti motivu, Lobeira esixó que los altos cargos "utilicen el gallegu como forma de prestixar la llingua pal so usu normalizáu". "Lo contrario", al so entender, "sería introducir la perceición de que'l gallegu nun val", algo qu'enmarcó "na política agresiva y regresiva del PP contra la llingua y cultura de Galicia".
  
"Si l'Alministración que tien de dar exemplu pasa olímpicamente y quita el gallegu de les oposiciones, de la enseñanza, de les campañes publicitaries, etc, xenérase la perceición de que'l gallegu ye inútil", criticó, pa esixir a los representantes públicos que "dean exemplu utilizando la llingua de Castelao nes sos intervenciones".
  
"El gallegu nun ye un frenu pa nada, sinón una seña d'identidá", calcó Lage Tuñas, qu'apelló a la "necesidá de buscar la concordia col amor contra lo propio dende les instituciones". Asina, destacó "los exemplos del ex conseyeru d'Economía José Ramón Fernández Antonio y del actual titular de Mediu Ambiente, Agustín Hernández, que s'esforzaron por deprender el gallegu pa utilizalu nel exerciciu de les sos funciones".
  
Tamién Agustín Baamonde destacó la importancia de la promoción del gallegu ente los altos cargos, pero siempre nun marcu de respetu a la llibertá individual, puesto que "tanto'l gallegu como'l castellán son llingües cooficiales na comunidá". "Nun se pue facer de l'Alministración una isla nel usu del gallegu", acabó, "pa sentenciar qu'el so grupu nun acepta la obligatoriedá del so usu".
  
"La llei ye clara y pon usar, nun promover", espetó'l voceru de la formación frentista, y xustificó esti puntu "na necesidá de dignificar el gallegu". "Cumplan la llei falando", cortó, "faciendo tamién estensiva esta esixencia a los miembros del Grupu Parlamentariu Popular".