Aznar diz que'l Gobiernu nun tien autoridá moral porque "fundió'l país"

Aznar dixo n'Uviéu que'l Gobiernu socialista nun tien yá autoridá moral porque "fundió'l país" y señaló que l'executivu nun ta lexitimáu "pa dicir cómo recoyer los escombrios".

José Mª Aznar realizó estes manifestaciones mientres la conferencia qu'ofreció güei na Facultá d'Económiques de la Universidá d'Uviéu convidáu por Nuevas Generaciones d'Asturies, pa falar sobre los temes más preocupantes na actualidá española.

A lo llargo de los 45 minutos que duró la so intervención, José María Aznar, dixo que lo qu'España precisa pa superar l'actual situación ye una axenda nacional de reformes que valga pa recuperar la competitividá perdida.
  
"Esti paquete de cambios que precisa'l país", según Aznar, "nun lo pue llevar a cabu l'actual Gobiernu nacional porque'l xefe de los pirómanos nun pue ser el capitán de los bomberos".
  
Asina, l'ex presidente del Estáu punxo en valor les polítiques qu'él y el so equipu punxeron en marcha en 1996, añu nel que llegaron al Gobiernu y nel que tamién había una crisis. Fueron años, relató, "nos que'l PP aplicó polítiques que valieron pa qu'España asitiárase como un puntu de referencia pal restu de los países y qu'hasta tornare nel mayor país n'inversión n'Iberoamérica". Esplicó que "algamó amenorgar el déficit y el desemplegu".
  
Sicasí,"señaló que l'actual crisis ye tovía mayor, porque l'Estáu ta más débil interna y externamente y que por eso precisa d'un gran capitán pa dirixir el rumbu contra la salida de la crisis". Aznar nun aforró crítiques contra l'actual presidente del Gobiernu, el socialista José Luis Rodríguez Zapatero, del que dixo que "nin tenía, nin tien convicciones pa ser presidente del Gobiernu".
    
Los mayores errores pa qu'España tea na actual situación, según Aznar, fueron "parar el procesu de reformes entamáu en 1996, negar la existencia de la crisis, y tomar midíes que yeren exactamente contraries a les que se precisaben".
 
Fundamento de la Transición
 
Pero l'ex presidente del Gobiernu alertó amás sobre un fenómenu que lu preocupa especialmente. Al so xuiciu, el Gobiernu actual "escaeció los pegoyos fundamentales de la Transición, aludiendo al compromisu de toos de mirar pal futuru, l'establecimientu de dos grandes suxetos constituyentes (el centru drecha y el centru esquierda qu'arrenunciaben a parte de los sos oxetivos pa vivir conxuntamente), y la tresformación nun país más descentralizáu, pero baxo l'aceptación de la llealtá a España".
  
Estos principios, según Aznar, "olviólos el Gobiernu de Zapatero, algo que nun ficiere nengún otru Gobiernu nel país". "Esti fechu derivó amás en qu'España sufriere dende'l 2004 un retrocesu bien grave, perdiendo amás influyencia internacional", añadió.
  
Pa recuperase de la grave situación económica, el presidente de la Fundación pal Análisis y los Estudios Sociales (FAES) manifestó que ye necesario "dar a los españoles la oportunidá de encalzar el rumbu históricu d'España". Afirmó que "lo importante nun ye llegar a un consensu o a un pactu porque si ésti sirviere pa siguir desarrollando polítiques como les actuales nun diba valir pa nada".
 
"Hailos que nun puen vivir ensin mi"
    
La intervención d'Aznar tuvo marcada pola irriada y los insultos d'un grupu de mozos que lu llamaron "facista, asesín y terrorista". Dientro del salón d'actos, apináu de públicu, al ex presidente del Gobiernu interrumpiéronlu hasta en cinco ocasiones mozos que pasaren los controles de la seguridá que punxo la organización". L'ex presidente respondió cola frase: "hai dalgunos que paecen empeñaos en demostrar que nun pueden vivir ensin mi".
  
El conferenciante tuvo qu'entrar pela puerta d'atrás del edificiu pa nun coincidir con una ventena de mozos que lu urriaben al glayu de  de "facista, asesín y terrorista".
  
Esti grupu de manifestantes diose cita nes inmediaciones del salón d'actos, onde diba tener llugar la conferencia, sobre les 12.00 hores. Portaben pancartes y glayaben conseñes como 'Aznar facista, tu yes el terrorista', 'Fuera los facistes de la Universidá', 'Aznar al talego como Vera y Barrionuevo', 'Non a la guerra' y 'PSOE y PP la mesma mierda ye'.
  
Los miembros de seguridá y de la organización algamaron torgar el pasu a los miembros de la protesta, que quedaron na zona de les escaleres, coles sos cánticos, vixilaos por efectivos de seguridá privada y pola organizadores del eventu.
  
A lo último, l'ex presidente entró nel salón d'actos per una puerta trasera, acompañáu de líderes asturianos del PP, de manera qu'evitaron el contactu visual colos miembros de la protesta.
  
Coles mesmes, y ente los aplausos de los asistentes a un salón d'actos que taba tremáu de xente, empezó l'actu, con quince minutos de retrasu. A les 12.45 Aznar empezaba falar.
  
Sicasí, los manifestantes organizárense bien y algunos entraron nel interior, como si tuvieren interesaos na conferencia, que yera abierta al públicu. D'esta manera, nun tardó en llegar la primer interrupción. Unos mozos cortaron el discursu d'Aznar a les 12.52 hores portando carteles de papel y al berru de fascista. Los asistentes al actu, urriáronlos mientres los espulsaben del llugar. Nel esterior, siguía'l grupu inicial, colos mesmos cánticos, recibiendo con aplausos a los espulsaos.
  
Mientres, Aznar aguantaba en silenciu, pa retomar la palabra. Foi nesi momentu cuando fizo la única referencia a los manifestantes de la mañana. "Bueno, nun pasa nada", dixo, quitando importancia, y recibió aplausos, de la que-y cantaben 'presidente, presidente'. "Hai algunos que paecen empeñaos en demostrar que nun pueden vivir sin mi", señaló, y recibió otra gran ovación.
  
Sicasí, el capítulu de les protestes nun acabó ehí y al ex presidente del Gobiernu interrumpiéronlu en cuatro ocasiones distintes mientres falaba. Yeren mozos que se llevantaben de sutrucu en distintos llugares y que glayaben 'criminal', 'cabrón' o 'mentirosu'.
 
La escena volvía ser la mesma. A los mozos espulsábenlos asistentes al actu, miembros de la organización y personal de seguridá, ente urriaes y dalgún berru de 'rojos'. Mientres Aznar falaba, intentaben detectar a posibles 'infiltrados'.
  
Al acabar la intervención d'Aznar, que duró 45 minutos, esti retiróse rápido acompañáu de los organizadores. Esta vez sí salió pela puerta principal y los manifestantes sí pudieron velu de lloñe. Siguieron glayando y faltándo-y. Una vez qu'Aznar salió d'escena, los asistentes al actu, partidarios del ex presidente enfrentáronse verbalmente col grupu de manifestantes.