El PAS quier más compromisu d’Uviéu cola llingua

El PAS quier que l’Ayuntamientu d’Uviéu use l’asturianu nos nomes de les folixes del Conceyu. Amás, pregunten pola situación de les Ordenances sobre usu del asturianu.

Dende l'agrupación d’Uviéu reclamen que'l nome de les distintes folixes que se realicen na ciudá treslládense al asturianu según el nome de la ciudá: Uviéu. “Dempués de munchos años, l'Ayuntamientu y la Sociedá Uvieina de Festexos espublicen un cartel animando a la participación na folixa baxu'l títulu “Uviéu de Antroxu”, allégranos ver que pocu a pocu hai dalgún avance”, indiquen dende’l PAS.

El Partíu Asturianista quier aprovechar pa preguntar a Arias-Cachero qué pasa coles Ordenances Municipales que diba aprobar el Consistoriu y qu’a día de güei nun se sabe nada. “Nun sabemos si tán paralizaes o l'Equipu de Gobiernu y la Comisión de Cultura escaeciéronse de les ordenances”, señalen.
 
Pa finar, l'agrupación d’Uviéu reclama al Conceyal de Cultura qu'esclarie cómo s'atopa'l procesu d'ellaboración de les ordenances y si esiste realmente dalgún tipu de voluntá por llevales alantre.