El catalán ye la llingua más desprotexida de la Unión Europea

El catalán ye la llingua más desprotexida de la Unión en rellación colos falantes y comparándola con otros Estaos plurillingües, según un informe de la Plataforma per la Llengua.

L'estudiu, qu'analiza Suiza, Finlandia, Bélxica, Canadá y España, compara la reconocencia llegal que tien el catalán nel Estáu español cola situación qu'esperimenten otres llingües con característiques semeyantes, como'l númberu de falantes, nel contestu européu.

La conclusión ye que'l d'España ye un "casu esaxeráu y estravagante", siendo l'únicu en tola Unión Europea que "nun reconoz ante esta instancia una llingua que ye falada por más del 10% de la población nin pretende pidir la oficialidá, pese a tener oportunidaes", declaró'l miembru de la Plataforma per la Llengua, Bernat Gasull.
  
Los informes planteguen que se fai un "tratu discriminatoriu" contra'l catalán y lléndase'l so usu, con polo menos 500 lleis qu'imponen el castellán nel territoriu; señala tamién la non reconocencia como llingua oficial, pese a que la falen más de nueve millones d'habitantes, y la imposibilidá del usu del catalán en webs oficiales como la Casa Real o l'Exércitu".
  
"Según la Plataforma, el catalán sería la 14ª llingua dientro de la Unión Europea, con un 17% de población que lo fala, pero tovía asina nun ye oficial dientro del España nin de la Unión Europea y namás se reconoz en dellos territorios de dominiu llingüísticu", añadió.
  
Los trés estudios plantegen el casu esceicional d'España dientro de tres aspectos, que son la presencia de les llingües propies en webs oficiales, el tratu reconocíu que reciben dientro de la Unión Europea y del Espaciu Schengen, y les disposiciones llegales qu'imponen el castellán primero que'l catalán.
  
Los informes aseguren que'l catalán ye dafechu inoráu en webs institucionales del Estáu, el Gobiernu, el Parlamentu, l'Exércitu y el Tribunal Constitucional, según el tresporte públicu o l'axenda oficial.
    
"Ye la única llingua non reconocida, pese a tener tantos falantes, y cuenta con más de 500 disposiciones, normatives y reglamentos que l'anulen frente al castellán, como etiquetar tou tipu de productos en castellán, según aeropuertos, carreteres, industries, tresportes, avisos al consumidor, documentos d'Alministración, denominaciones d'orixe, ente otros", añaden.
  
Plataforma per la Llengua presentó estos informes aprovechando la situación d'alderique llingüísticu, dao que quieren que la llingua catalana consiga "un mínimu de estatus llegal o que se supriman les normes impositives del castellán" porque, hasta entós, "los ciudadanos del dominiu llingüísticu nun van esfrutar de los derechos que se reconocen a les demás llingües".