Bruxeles diz que suspender l'estatutu con Marruecos perxudicaría a la UE

|

La Comisión Europea piensa que suspender l'estatutu avanzáu de cooperación con Marruecos, como piden dellos partíos políticos españoles, nun diba valir pa los intereses de la Unión.

"L'estatutu avanzáu otorgáu a Marruecos constitúi un instrumentu más p'afondar nel diálogu y l'entendimientu", argumenta la CE nuna respuesta parlamentaria dirixida al eurodiputáu d'Izquierda Unida Willy Meyer, que plantega suspender tal marcu de cooperación porque considera que Rabat "aumentó la represión contra'l pueblu saḥaraui".
 
L'eurodiputáu cita, ente otros casos, el de la detención de l'activista Aminetu Haidar, a la que "les autoridaes marroquines torgaron tornar a la so casa en L’Ayún (Saḥara Occidental) y treslladaron contra la so voluntá a Lanzarote, onde caltuvo una llarga fuelga de fame hasta llograr la so vuelta a casa".
  
La Comisión yá tien conocencia d'estos fechos y afirma que'l cumplimientu de los principios en materia de Drechos Humanos ye "sin duda un elementu central de les rellaciones UE-Marruecos", añade l'Executivu comunitariu.
  
Na so respuesta, la CE resalta de la mesma manera que nos últimos años llográronse meyores significatives nes rellaciones UE-Marruecos "que contribuyeron al movimientu de reforma democrática nesi país y garantiza que se va esforzar en reforzar el compromisu de Marruecos a favor d'unos principios de democracia y Drechos Humanos asemeyaos a los esistentes na UE".
  
"Marruecos aceptó principios importantes, en particular siguir avanzando nel ámbitu de la reforma del sistema de xusticia, aceptar la incorporación a estremaos convenios del Conseyu d'Europa y adoptar progresivamente les normes de la UE", continúa, "señalando de siguío qu'espera que l'aplicación d'estos oxetivos contribuya a meyorar la gobernabilidá en Marruecos y a fortalecer el respetu a los Drechos Humanos".

Contador Estadistiques