Pepe El Ferreiro tien problemes pa recoyer los sos oxetos personales

Pepe El Ferreiro foi güei hasta'l so antiguu despachu pa llevar los sos oxetos personales. Sicasí, lo que diba ser un meru trámite, acabó nun discutiniu col actual direutor.

La escena tuvo llugar esta mañana a les 11.00 hores, cuando Pepe El Ferreiro foi al so anterior centru de trabayu, dempués de llograr el permisu correspondiente del Muséu, pa retirar los oxetos del so antiguu despachu. Foi acompañáu del so fíu y otra persona, "pero nun los dexaron entrar". Sí qu'entró acompañáu d'una notaria, en busca de la so axenda, llibros, premios, galardones o fotografíes de la so propiedá.
  
El problema surdió, siempre según la versión de los averaos a Pepe 'El Ferreiro', cuando entamó un discutiniu col nuevu direutor del centru, Francisco Cuesta, sobro lo que podía llevar y lo que non, como por exemplu una axenda. "Lo último yá foi cuando diba coyer del so caxón la última nómina y nun lu dexaron, diciendo que yera del muséu", afirmaron. En vista de la situación, Pepe 'El Ferreiro' decidió marchar ensin garrar nengún oxetu.
 
Dende la Plataforma d'Apoyu a Pepe 'El Ferreiro' calificaron los fechos de "sangrantes escontra una persona que dedicó toa una vida al muséu". Esplicaron que l'antiguu director del centru cultural ta "mui afectáu" polo asocedío.
  
Pela so parte, l'actual director, Francisco Cuesta, refugó realizar comentariu algún sobre lo asocedío esta mañana nel Muséu.  Mañana precisamente celébrase nel Ayuntamientu de Grandas de Salime un Plenu Municipal nel que la oposición va pidir el reestablecimientu de Pepe El Ferreiro nel so cargu. Amás, ta convocada darréu una rueda de prensa del propiu ex direutor, na que ta previsto que retruque los argumentos espuestos ayeri pola conseyera de Cultura y Turismu del Principáu d'Asturies, Mercédes Álvarez, que faló nel Parlamentu asturianu sobre la so destitución..