"Cantar de redención" de Dixebra, meyor canción n'asturianu

“Cantar de la redención” de Dixebra, ye la ganadora del Premiu de la Música al meyor cantar n’asturianu de los Premios de la Música qu’empobina l’Academia de la Música y la SGAE.

Los galardones foron daos a conocer güei y los premios, qu’esti añu algamen la so 14ª edición, van entregase’l próximu cuatro de marzu nel madrilanu Teatru Häagen Dazs Calderón.
 
A la fin “Cantar de redención”, espublizáu nel últimu discu de la banda, “Amor Incendiariu”, y de la que son autores Paco Álvarez y Sergio Rodríguez, impúsose a  “11 de mayu” de Mapi Quintana, “El canciu’l mineru” de Spanta la Xente y “Ye lo que nos pasa” de Músicos pola Oficialidá.
 
Dixebra ye la formación decana del rock n’asturianu. Lleven casi 25 años faciendo música y hasta’l momentu publicaron diez discos faciendo un rock mestizu d’influencies variaes y reflexando nes sos lletres la realidá social d’Asturies. El grupu avilesín ye tamién ún de los nominaos al Premiu al Meyor Cantar, que va entregase esti sábadu en Mieres.
 
Los ganadores dende la creación de la categoría, una reivindicación del coleutivu de músicos asturianos, foron Pepín Robles con «Nunca máis» (2004), Chus Pedro con «Agora sal a bailar» (2005), Los Berrones con «Fai deporte» (2006), Rossaleda Jazz Quartet con «Na fonte» (2007), Tejedor con «Seique non» (2008) y Esther Fonseca con «Negra» (2009).