Abxazia acoyerá una base militar rusa nel so territoriu

La rexón secesionista xeorxana d'Abjazia va dexar a Rusia construir una base militar nel so territoriu, colo qu'afonda na dependencia de Moscú y col que se provocó la ira de Tiblisi.

El líder abxaziu, Sergei Bagapsh, que llegó güei a Moscú, va roblar mañana esti acuerdu col presidente rusu, Dimitri Medvedev, según responsables de la rexón secesionista. Pela so parte, el Kremlin confirmó que la xunta sí va tener llugar, pero evitó comentar la posibilidá de roblar un acuerdu militar.

Moscú reconoció la independencia d'esti territoriu dempués d'enfrentase nuna guerra a Xeorxa n'agostu del 2008 pola otra rexón secesionista, Osetia'l Sur. L'acuerdu de mañana va dexar una base militar en territoriu abxaziu pa tropes terrestres ruses, afirmó'l viceministru de Defensa de la rexón secesionista, Garri Kupalba, en declaraciones telefóniques a Reuters.
    
Aseguró que la nueva base, que va unir distintos puntos a lo llargo de Abxazia y va acoyer polo menos a 3.000 soldaos, va construyise nel futuru próximu. Amás, el viceministru d'Asuntos Esteriores abxaziu, Maxim Gvindzia, indicó que "los soldaos pa la nueva base yá tán aparcaos na rexón".
  
Mientres, Xeorxa indicó que los planes pa construyir una base terrestre son illegales. "Abxazia y Osetia'l Sur son territorios xeorxanos, y el despliegue de tropes estranxeres en territoriu d'otru país denomínase ocupación", afirmó'l presidente del Parlamentu, David Bakradze. "Dende l'agresión rusa del 2008, Abxazia y Osetia'l Sur tornaron nuna base militar pa Rusia", añadió.
    
N'abril de 2009, Rusia asumió formalmente'l control de les fronteres de facto d'Abxazia y de Osetia'l Sur, lo que provocó una condena xeneralizada de les potencies occidentales.
  
Rusia tamién instaló soldaos de los Exércitos de Tierra, Mar y Aire nesta rexón d'unos 200.000 habitantes, y empezó a trabayar en distintes bases qu'entá tienen que ser completaes, lo que provocó que la OTAN y Estaos Uníos denominaren esti fechu como una violación del Derechu Internacional.