Asturies ye la única comunidá onde siguen cayendo les ventes de coches

Asturies ye la única comunidá que sigue dando datos negativos nel mercáu de la automoción, según datos de la Federación d'Asociaciones de Concesionarios de la Automoción.

Faconauto revela que nes dos primeres selmanes de febreru matriculáronse nel Principáu un total de 606 coches, frente a los 638 de va un añu, lo que supón una cayida del cinco por cientu.
  
En concretu, l'estudiu revela que les ventes a particulares rexistraron una cayida del 6,3 por cientu. El restu de canales evolucionó con un ascensu del 2,4 por cientu nel sector de les empreses y un ascensu del 50 por cientu nel programa 'rent a car'.
  
Nel total nacional, les matriculaciones fueron 38.216, frente a los 24.756 de va un añu, esto ye un aumentu del 54 por cientu. Una vez más dende la puesta en marcha del Plan 2000E, el mercáu de particulares llogró remontar les ventes un 38,5 por cientu, con 23.358 unidaes matriculaes estes dos primeres selmanes del mes, frente a les 16.868 de va un añu.
  
La canal 'rent a car' fixa la so recuperación con 8.364 vehículos vendíos nesta canal, frente a los 1.782 de 2009, lo qu'ofrez un espectacular incrementu del 369,4 por cientu. A lo último, la canal d'empreses sube un 6,5%, con 6.494 matriculaciones, en comparanza coles 6.106 de va un añu.
  
Por comunidaes autónomes, Madrid encabeza les subíes, con un 97,4%,impulsada poles compres feches polos 'rent a car', que subieron un 582%. Nesta llinia alcuéntrense tamién la Comunidá Valenciana, onde les matriculaciones crecen un 69,2%, siguida d'Estremadura (+58,5%) y Andalucía (+52,8%), onde la canal de los alquiladores tamién se disparó (+769,2%).
  
El restu de rexones esperimentaron coles mesmes datos positivos, como Galicia (+28,4%), Murcia (+27,5%), País Vascu (+23,9%), Castiella y Lleón (+17,5%), Cantabria (+16%), La Rioxa (15,7%), Aragón (+12,8%) y Ceuta y Melilla (+8,5%).