Yá se pue descargar l’Anuariu Sonoru 2009

Un total de 44 cantares y 17 videoclips formen l’Anuariu Sonoru’09, recopilatoriu editáu pol portal dixital d’información musical www.fnast.net y por Ensame Cultural Sonastur.

Nel anuariu recuéyese l’actividá de los grupos asturianos que fixeron dalguna grabación en 2009. Según el coordinador del proyeutu, Xicu Ariza, anque existan otros anuarios esti ye un formatu orixinal hasta la fecha y complementariu colos otros. “Esa ye la parte más positiva, la de facer daqué nuevo qu'ayude a dinamizar un poquiñín más esta escena musical asturiana que tien tantes carencies d'infraestructures”, señala.
 
Basándose na defensa de los organizadores del llibre y máximu espardimientu de la cultura, l’Anuariu distribúyese de baldre al traviés d’internet. Pue descargase na páxina musical www.fnast.net y, xunto a los cantares y videoclips, acompáñalo un llibretu en formatu pdf con información biográfica sobre los grupos participantes, el nuevu proyeutu d’anuariu y los sos promotores.
 
L’oxetivu cimeru del Anuariu ye “da-y el máximu puxu a la música fecha n’Asturies; una escena musical viva qu’anque amuese bayura y calidá tien qu’enfrentase a numberoses torgues: falta d’infraestructures, carencies informatives xeneralizaes nos medios mayoritarios y apueste insuficiente de les instituciones públiques pa col son compuesto dientro d’estes llendes”.
 
Xicu Ariza camienta tamién que n'Asturies hai poco públicu de música alternativa, ente los motivos señala la poca población mozo cola que se ta quedando esti país o que los medios nun apoyen la música como deberíen, “lo que fai que muncha xente desconoza lo qu'equí se cuez”.
 
Otra cosa negativa que ve ye la concentración musical en mui pocos puntos del país, “sacantes nel branu Xixón abarca práuticamente tola actividá, esto tien que camudar dafechu pa que'l país suene”.

Dende los organizadores, apuesten por esti nuevu proyeutu y nagüen por que s’afite dientro y fuera d’Asturies, siendo – xunto colos otros dos anuarios asturianos qu’existen yá - un referente pa los que se quieran averar a los ritmos fechos na Comunidá Autónoma. D’esti mou yá s’alcuentren trabayando con tiempu nel Anuariu Sonoru ’10 pa que medre en calidá y participación.
 
www.fnast.net
 
Sobre’l portal Fnast, con poco más d'un añu d'esistencia, Xicu Ariza esclaria que pasu ente pasu va medrando la páxina en calidá y visites. “Tovía tenemos munches carencies y fáltanos abondo pa ser el mediu referencial de la música asturiana, pero a base d'un trabayu constante tamos seguros de que vamos algamalo”.