La izquierda abertzale llama a entamar el "cambiu políticu"

La izquierda abertzale llamó esti llunes a entamar el cambiu políticu n'Euskadi "n'ausencia total de violencia y ensin inxerencies", y comprometióse al usu de medios democráticos.

Amás, en dando por acabáu'l so alderique internu, animó a les fuerces progresistes y populares del país a "facer irreversible un procesu qu'acompañe la comunidá internacional".
  
Nun comunicáu, la izquierda abertzale afirma que, demientres esti fin de selmana, axuntó a les sos asamblees territoriales de Alava, Vizcaya, Guipuzcoa y Navarra, que rexuntaron a cerca de 600 militantes independentistes en representación de les más de 270 poblaciones nes que realizó nos últimos meses el so procesu d'alderique.
  
Nel testu, el coleutivu asegura que da per acabáu l'alderique nel que definió y decidió la so estratexa política, realizó un análisis de la situación política d'Euskal Herria y evaluó el procesu d'alderique, tres lo que se definió la planificación política de la izquierda abertzale pal 2010.
  
A lo último, les asamblees territoriales confirmaron la resolución 'Zutik Euskal Herria' (Euskal Herria en pie), que recueye "les conclusiones del debate y l'apuesta política de la Izquierda Abertzale".
  
Nel primeru de los cuatro puntos del documentu, la militancia constata que "la fase política a la que se dirixe Euskal Herria ye la fase del cambiu políticu, per mediu del procesu democráticu". Esto ye, una vez creaes les condiciones del cambiu, "llega la hora de realizalu", afirmen.
  
Pa la izquierda abertzale, l'oxetivu d'esa fase política ye "llevar a cabu esti cambiu políticu, llogrando'l marcu democráticu qu'ufierte les abondes bases por que tolos proyectos políticos seyan defendibles y materializables nel nuesu país". "Algamando asina una paz estable pa Euskal Herria. Asumir l'apuesta de materializalu esixó y esixe cambios tamién en nós mesmos", añade.
  
Consideren que la oportunidá d'un cambiu políticu verdaderu, la oportunidá de superar el ciclu actual y abrir otru democráticu, "ta abierta de par en par y agora'l desafíu consiste en cruzar esa puerta abierta tres décaes de llucha y trabayu y efectuar el cambiu políticu". "Hai condiciones polítiques y sociales abondo pa ello", indica.
  
Darréu, diz insistir nel compromisu col usu de víes y medios puramente políticos y democráticos y afirma que "son dichos medios los que faen posible la necesaria activación popular y la unidá d'acción de les fuerces democrátiques y progresistes del país, garantía, motor y exe de tracción de l'abertura y meyora del procesu democráticu".
  
Amás, señala qu'esi procesu tien de desarrollase "n'ausencia total de violencia y ensin inxerencies, basándose nel diálogu y la negociación ente les fuerces polítiques" polos principios del senador Mitchell".
 
Acumulación de fuercies
  
El cuartu y últimu puntu afirma qu'una amplia acumulación de fuerces per mediu puramente de la llucha de mases, institucional y ideolóxica va suponer la base pa llevar al Estáu al terrén de la confrontación llibre y democrática d'idees y proyectos políticos, y poder asina algamar un escenariu onde los ciudadanos vascos llibre, pacífica y democráticamente adopten les decisiones que deseen sobre'l so futuru"
  
Por too ello, fai un llamáu a la sociedá vasca y al conxuntu de fuerces progresistes, demócrates y populares del país a que "calteniendo y respetando caúnu la so hestoria, personalidá y ser unan fuerces pa faer esti procesu irreversible". A lo último, animen a la comunidá internacional a acompañar dichu procesu.
  
"Tamos convencíos que nesti camín y per mediu del trabayu común y l'activación popular, los meses venideros van deparamos nueves meyores y escenarios que faigan esti procesu irreversible", acaba.