El Sortéu de Navidá dexa n'Asturies más de tres millones d'euros

El sortéu de la Llotería de Navidá dexó n'Asturies polo menos 3.400.000 euros repartíos n'Uviéu, Xixón y Llangréu, correspondientes a cuatro quintos premios, anque foi la capital asturiana la más agraciada pola suerte.

L'alministración que repartío más dineru foi la númberu 12 d'Uviéu, conocida como La Favorita, que vendió 450 décimos del númberu de 56.430 premiáu con un quintu premiu na llotería de Navidá. En total, repartió ente los sos clientes 2.250.000 millones d'euros. El mayor númberu de décimos vendióse en participaciones pol Mesón El Tormes, na cai Félix Aramburu d'Uviéu.

Silvia González, emplegada nel mesón, en declaraciones a los medios, mostróse contenta y tovía ensin poder creelo. "Ye la primer vez que me toca dalgo, yo taba equí trabayando y enteréme pela televisión", esplicó la moza agraciada con 5.000 euros.

Igualmente, s'enteró pela televisión David García, emplegáu d'un llaboratoriu farmacéuticu, que taba nesi momentu nel hospital. "Ye más l'allegría de que nunca me tocare nada que la cuantía, anque tamién ye importante", esplicó García, qu'estes navidaes xuega sobre 600 euros.

Los clientes habituales del mesón 'El Tormes' facíen memoria de la última vez que-yos tocare dalgo. "A mí tocáronme 30.000 pesetes una vez", comentó ún de los premiaos, qu'esti añu xugaba una cantidá cercana a los 300 euros.

Tamién n'Uviéu l'alministración númberu 22 de la cai Fuertes Acevedo resultó agraciada al vender 200 décimos del númberu 36.199, tamién premiáu con un quintu premiu. En total, un millón d'euros. La suerte nesti casu tuvo mui repartida puesto que l'alministración vendióse casi tolos décimos a turistes y por tar cerca del Hosptial Central d'Asturies a persones que fueron al centru hospitalariu por dalgún motivu, según indicó la llotera Gemma Garzo.

La suerte tamién dexó en Xixón y Llangréu dos quintos premios, anque'l númberu de décimos vendíu foi inferior. Nel casu de Xixón, l'alministración númberu 7 de la cai Magnus Blikstad vendió una serie del númberu 29.127, dotáu con 50.000 euros a la serie, que cayó nun particular que "lo tien reserváu tol añu dende 1975".

La llotera, María Jesús Cano, en declaraciones a Europa Press, señaló que la persona que siempre xuega a esi númberu demientres tol añu yá ganó otros premios. "Tien muncha suerte", añadió. La responsable del puntu de venta de Xixón esplicó que munches persones s'averaron a la so Alministración pa pidi-y esi númberu. "A toos-yos tuve que dicir que taba reserváu", señaló.

Tamién en Xixón, el matrimoniu que rexenta la cafetería Losa, frente a la estación d'autobuses, vendió ente los sos clientes 15 décimos, tamién del 29.127 que-y unvió un familiar dende Salamanca. Los últimos cuatro décimos repartiólos ayeri'l matrimoniu ente la so familia puesto que-y quedaron pendientes de vender. Dos décimos fueron pal matrimoniu, otru pa la so fía y otru pa un tíu, según confirmó a los medios de comunicación el propietariu.

En Llangréu, l'Alministración númberu 4 de La Felguera, de Llangréu, na cai Rafael Elderai, repartió 50.000 euros del númberu 30.227, agraciáu con un quintu premiu.

La propietaria de l'Alministración, Rosario García García, esplicó que los diez décimos fueron vendíos na ventaniella. Aseguró, en declaraciones a Europa Press, que l'Alministración leva 20 años abierta, pero esta ye la primer vez que da un premiu de Navidá, anque sí repartió yá un primer y un segundu premiu de la llotería nacional de los sábados.

VENTES N'ASTURIES

La venta de llotería de Navidá n'Asturies aumentó esti añu un 6,5 por cientu sobre'l 2007, mientres qu'a nivel nacional descendió un 2,79 por cientu.

El delegáu n'Asturies de Lloteríes y Apuestes del Estáu, Roberto Morales, rellacionó esti incrementu de venta n'Asturies col 'Gordu' que cayó l'añu pasáu n'Avilés, Llanes y Nava.

Nel 2007, el sortéu de Navidá dexó nel Principáu más de 360 millones d'euros correspondientes al númberu 6381, agraciáu col 'Gordu' y al 11.654 correspondiente a un quintu premiu. El 'Gordu' vendióse n'alministraciones d'Avilés, Nava y Llanes, mientres que parte del quintu premiu foi pa La Felguera.