Espicha setentera en Tierra Astur

El xueves día 18 de febreru, nel local de la sidrería Tierra Astur, allugáu en Cualloto, onde la antigua fábrica de cerveza, va entamase una espicha dedicada a les décades musicales de los años 60, 70 y 80. "Una folixa revival pa, ente culín y culín, a ver si t’alcuerdes d’aquella que decía……. Soi de Verdiciu, Blaquisblá, axúntabense, vacaciones de verano".
 
Dende la organización señalen que "ensin desdexar los cantares y cantantes asturianos, la xente va poder sentir de nueves una riestra de cantares, ver imaxes de series de tv, portaes de discos, xuguetes, vidios, caraoques, que cante, baille y participe de les alcordances que llevamos na memoria collectiva les xeneraciones que vivimos eses décades y que, per un motivu o per otru, llamáronmos l’atención y qu’anguaño conocen tovía muncho xente mozo".
 
Los asistentes van poder apaecer "con aquelles camises de cuellos anchos y floríes, pantalones apretaos y pata elefante, o de pitillu, camises o vestíos de cachemir, xerséis de cuellu cisne, encorbataos, vestíos camiseros, pameles, con xilecos de rombos, pelo cardao, muncha laca, pelo a lo afro, cintes al pelo..." Amás, dende la organización señalen qu'esta vegada, hai premios pa los que vengan antroxaos.