Pino (CC.OO) llama 'jetas' y inmorales a los empresarios que piden más flexibilidá nel mercáu de trabayu

El secretariu xeneral de CC.OO Asturies, Antonio Pino, calificó güei de 'jetas' y de "inmorales" a los empresarios que tán pidiendo a les Alministraciones mayor flexibilidá del mercáu de trabayu nel actual contestu de crisis económica. Pino dixo que confía en que'l Gobiernu nun ceda a eses presiones y alvirtió de que d'executase una midida nesa direición el so sindicatu diba salir a la cai de manera "fuerte" y "contundente".

Pino fizo estes manifestaciones, a entrugues de los periodistes, nuna rueda prensa ofrecida n'Uviéu con posterioridá a un conceyu col presidente del Principáu d'Asturies, Vicente Álvarez Areces, y col conseyeru d'Industria, Graciano Torre, pa presenta-yos el décimu congresu rexonal de CC.OO, que va celebrase en febreru.

El cabezaleru sindical recordó que'l presidente d'España, José Luis Rodríguez Zapatero, yá dixo que nun quier esa flexibilización. Esplicó que n'España yá ye mui fácil despidir y tachó de "insaciables" a los que defenden abaratar el despidiu.

De la mesma manera, señaló qu'eses pretensiones son "inmorales", porque l'orixe de la crisis se debe precisamente a que'l sector financieru, a dalgunos Gobiernos que "miraben pa otru llau", y a empresarios "que s'enllenaron los bolsiellos".

Per otru llau, Pinó mostró'l so apoyu al nuevu secretariu xeneral de CC.OO, Ignacio Fernández Toxo, al que, según dixo, votó favorablemente la delegación asturiana nel IX Congresu Confederal de la organización. "Ye la persona qu'abrió la mano pa conformar una candidatura unitaria que recueya la rica pluralidá qu'hai en CC.OO", afirmó, señalando que Toxo va ser quién a integrar al conxuntu de sensibilidaes pa facer al sindicatu más eficaz.