Mercedes Álvarez diz que la xestión d'El Ferreiro yera insostenible

Mercedes Álvarez esplicó na Xunta Xeneral los "numberosos motivos y irregularidaes" que llevaron al consorciu xestor del Muséu de Grandas de Salime a destituyir a Pepe El Ferreiro.

Álvarez destacó "la permanente negativa a collaborar col consorciu, a rindir cuentes, a apurrir la información que se-y solicitaba, la venta de pieces a particulares, los pagos duplicaos o'l desarrollu d'obres illegales", como dalgunos de los motivos que determinaron el so destitución. "Ye imposible qu'una Alministración comprometida cola llegalidá pudiere caltener por más tiempu esta situación, yera insostenible", dixo Álvarez.

"Pidióse-y un cambiu de rumbu y inorólo, llevaba años torgando la xestión del muséu en cuestiones tan vitales como la ellaboración d'un llistáu de bienes patrimoniales o demás. La situación de descontrol na xestión yera tala que de siguir asina podíen imputase al propiu consorciu responsabilidaes penales. La escuridá de papeles y cuentes ensin posibilidá de que'l consorciu conociera nada", dixo Álvarez.
  
La conseyera aseguró que cola so destitución "ábrese un periodu de transición col que'l Gobiernu aspira a llograr tolos oxetivos y planes que tien pal centru y qu'hasta agora llamentablemente nun fueron a algamar por distintos motivos".
  
Indicó que la Conseyería ye quien más apoyó esti muséu y recordó que les aportaciones económiques fueron constantes añu tres d'añu, dao que dende'l 2001 diéronse 1,6 millones d'euros al consorciu, lo que reflexa l'interés mostráu siempre dende'l Principáu. "Entamamos una nueva etapa nel centru y ello implica'l cese d'una persona que dende'l 89 ocupaba un puestu de llibre designación, esto ye un cargu de confianza", dixo.
  
Mientres la so comparecencia manifestó qu'a Pepe El Ferreiro equiparóse-y la remuneración, pese a "nun disponer de la titulación académica requerida pa un cargu asina y aseguró que se fai necesariu "esclariar les falsedades que se ficieron públiques estos díes y que presenten a Pepe El Ferreiro omo víctima mal retribuida". "Césaselu porque'l consorciu perdió la confianza básica pa la xestión encamentada", insistió Álvarez.
 
Irregularidaes abondo
  
Nesti sen, refirióse a la permanente negativa del daquella direutor del muséu a cumplir lo que se-y pidía -ellaboración d'un inventariu o xustificación de gastu de los fondos- y la so total negativa a collaborar. Aseguró que se trata d'irregularidaes que dexen clara "la grave dexación de les responsabilidaes del so direuor" y añadió que "la xestión del muséu yera tan escura que tovía tán analizando la situación".
  
Añadió detalles d'eses munches irregularidaes, como por casu l'espediente sancionador abiertu pola Axencia Tributaria, dao que Pepe "negábase a atender a les solicitúes de control d'organismos internos y esternos del Principáu o'l desarrollu d'obres non autorizaes, como una vivienda privada na parte alta del Muséu". Dixo amás que les cuentes rindíes nun s'adauten a los modelos contables d'aplicación llegal, tampoco rindió información sobro contratos menores, nin unvió información sobro contratos d'alta direición, "amás de cometer estremaes incidencies na xestión de los pagos".
  
"Nun cumplía les funciones establecíes nel so contratu. Había una argucia alministrativa que nun se podía siguir dexando porque amás entrábamos n'irregularidaes penales", dixo Álvarez, qu'añadió que tampoco había un llibru de rexistru de los depósitos del muséu, inventarios, catálogos de fondu nin demás material necesariu.
  
La conseyera criticó tamién el tonu col que Pepe El Ferreiro referíase a l'Alministración, "el descontrol na venta d'entraes del Muséu, o nes cuentes bancaries". Dixo amás que se deteutoqu'el que yera direutor llegó a vender pieces integrantes del centru a particulares ensin consultar al consorciu.
  
Esplicó que'l Muséu abrirá'l próximu vienres 19. "Esperamos y vamos trabayar por que'l Muséu se consolide dientro de la rede de Museos etnográficos", dixo.
 
Respuesta del PP
  
El diputáu del grupu parlamentariu del PP, Alfonso Román López, acusó a la conseyera de dir a la Xunta a "enfangar el prestixu y bon nome de Pepe El Ferreiro" y esixó respetu pal mesmu. Amás criticó que la conseyera "nin siquier visitare'l muséu y afirmó que según-y consta al PP nun hai nengún muséu que cuente con inventariu.
  
"Hai collaboración del direutor, ye la falta de presupuestu de la Conseyería la que torga qu'una empresa lleve a cabu'l llabor del inventariu", dixo Román López, qu'indicó qu'ésta ye una de les acusaciones que pudieron comprobar, pero hai otres más hectárees que nun pueden controlase y que nun se sostienen.
  
Indicó que'l PP nun comparte la decisión del Gobiernu del Principáu y consideró que se trata d'un ataque a una instalación cultural del occidente d'Asturies, dao qu'aseguró que-y atribúin responsabilidaes al ex director que nun-y pertenecen. Dixo amás que la esplicación de la conseyera dexa claro qu'hubo "una dexación de funciones per parte del consorciu xestor bien patente".
  
Pepe El Ferreiro "ye'l mesmu dende hai 26 años", dixo Román López, qu'indicó qu'el so grupu nun va xustificar tolo que fizo, pero'l "balance global ye bonu o bien bonu, por ello manifestó que difícilmente la conseyera pue convencelos de les razones que lu llevaron a la so destitución". Anunció amás que van llevar al Plenu de la Cámara una proposición non de llei sobre esti asuntu pa tratar de reconducir la situación.
  
Pela so parte el diputáu del grupu parlamentariu d'IX-BA-Los Verdes, Roberto Colunga, criticó l'ausencia de xuntes del consorciu xestor del Muséu. Dixo amás que la figura de Pepe'l Ferreiro sobrepasa a la d'un direutor.
  
Dixo amás que los argumentos de la conseyera "nun coinciden colos qu'el so grupu tien y aseguró qu'a pesar del carácter "tochu" del ex direutor gracies a él, "el Muséu ye lo que ye". Amás criticó que la conseyera tratare güei de desprestixar a El Ferreiro "d'una forma un poco mezquina".
  
Al so xuiciu'l Gobiernu ta creando un conflictu, yá que recordó que la figura de Pepe'l Ferreiro "ta recibiendo numberosos apoyos y amás esti asuntu va llegar a la vía xudicial y llaboral, polo que pidió a la Conseyería que rectifique y vuélva nomar a Pepe El Ferreiro director del Muséu".