Gas Natural estima que los llagares podríen aforrar el 13,8% d'enerxía

Gas Natural estima que los llagares podríen aforrar el 13,8% d'enerxía. La empresa avanzó los datos na presentación en Xixón d'una guía de bones práctiques pal sector llagareru.

L'oxetivu fundamental de la publicación ye evaluar l'estáu actual de los llagares, bien representativos del texíu empresarial y social d'Asturies. Coles mesmes, la guía muestra cómo al modificar algunos comportamientos consíguese una mayor eficiencia enerxética, parámetru midíu pol Índiz d'Eficiencia Enerxética de Gas Natural.

Pa la ellaboración de la guía analizáronse los consumos enerxéticos n'Asturies y, más en fondura, la enerxía utilizada nos llagares pertenecientes a l'Asociación de Lagareros d'Asturies.
  
Pa ello, Gas Natural esaminó cuatro elementos que formen el so Índiz d'Eficiencia Enerxética: innovación, caltenimientu, control y cultura enerxéticos. L'estudiu pon de manifiestu que son los llagares más pequeños los más preocupaos pola innovación, los que busquen la meyor y más afayadiza tecnoloxía.
    
Sicasí, onde se da una mayor concienciación y cultura enerxétiques ye nos llagares medianos. No que cinca a les otres variables, destaquen otra vuelta los más pequeños, al dedicar una mayor atención tanto al control como al caltenimientu de les sos instalaciones.
  
Pal llogru d'aforros enerxéticos, l'estudiu propón executar distintes aiciones en caúna de les tecnoloxíes presentes nes instalaciones, como son el llume, la climatización y la maquinaria.
    
Como conclusión, l'estudiu manifiesta que l'aforru enerxéticu posible con una combinación d'actuaciones sobre distintos puntos ayudaría a los llagareros a maximizar la rentabilidá del llagar y al empar algamar un aforru enerxéticu y amenorgar los gases contaminantes.