El Muséu del Pueblu d’Asturies, el segundu más visitáu del país

El Muséu del Pueblu d’Asturies ye’l segundu más visitáu de país, per delantre del Muséu de la Minería o’l Belles Artes. El Muséu del Xurásicu consolídase como’l más visitáu d’Asturies.

La Conseyera de Cultura y Turismu del Principáu, Mercedes Álvarez González, ofreció ayeri n'Uviéu los datos del últimu exerciciu nos equipamientos culturales y les biblioteques públiques. Álvarez afitó que, per primer vegada, los equipamientos culturales y museísticos superaron la barrera del millón de visitantes y les biblioteques públiques dieron serviciu a más de tres millones de persones. Los datos amuesen, en pallabres de la Conseyera, que la cultura convertióse nun bon abellugu pa los asturianos en tiempos de crisis.
  
El Muséu Etnográficu del Pueblu d'Asturies esperimentó un crecimientu superior al 119% por cientu hasta algamar los 125.313 visitantes, lo que lu convierte nel segundu más visitáu d'Asturies per delantre del Muséu de la Minería.
 
El muséu más visitáu del país ye’l del Xurásicu, que recibió en 2009 un total de 140.631 visitantes, un 26% más que l'añu anterior. N'agostu, el MUXA recibió 45.508 visites, coincidiendo cola esposición “Atrapaos nel Xelu”, un 22% más qu'en 2008.
 
El que nun meyoró foi’l Muséu de Belles Artes, que perdió un 3% de visitantes, un descenso que la Conseyería atribúi a les obres de reforma y ampliación que se ta cometiendo na pinacoteca. “Una vegada que fine la obra dirixida por Pachi Mangado, vamos cuntar con un edificiu que tea al altor d’una de les meyores coleiciones pictóriques qu'hai n'España y con un muséu capital pa Uviéu y pa tol Principáu”, alvirtió la Conseyera . El Muséu de Belles Artes contabiliza un total de 62.859 visitantes.
 
El Muséu del Pueblu d’Asturies, creáu en 1968 y asitiáu en Xixón, amuesa nun recintu de 35.000m2 la cultura y l'arquitectura tradicional del país, conservando la memoria ya identidá del pueblu asturianu.
 
El muséu cuenta con delles seiciones nes que s'investiguen, caltienen, esponen y espublicen testimonios d’una vida tradicional que ta en procesu de desaniciu: una coleición etnográfica integrada por unes seis mil pieces; una fototeca formada per alredor de doscientes mil imaxes; un archivu documental compuestu por documentos familiares y comerciales, correspondencies d'emigrantes, etiquetes, carteles, etc.; un fondu de música y preseos musicales nel que destaca la coleición internacional de gaites, y un archivu de testimonios orales (lleendes, cuentos, romances, memories, etc.).