Ayer recupera “La Porria”
|
14 Febreru, 2010 por Damián Barreiro
- Inicie sesión o rexístrese pa espublizar comentarios
La localidá ayerana de Cuergo va celebrar el próximu llunes l’antroxu recuperando la tradición de “La Porria”, una llucha ente los pueblos de la zona alta d’Ayer que taba perdida.
Los mozos retábense nuna llucha con piedres y cencerros. Mientres que los neños diben antroxaos con pelleyes de corderu y sacos, y les neñes antroxábense con ropes vieyes, siempre bien protexíos pa evitar los golpes de les piedres. Tamién llevaben la cara tapada pa evitar posibles engarradielles depués de que pasara l'antroxu.
El grupu de neños d'un pueblu corría en direición al pueblu vecín y cuando llegaba a terrenos d'ésti y atopábense colos sos rivales glayaben: ¡Porria Cuergo! (nel casu de que s'atoparen colos neños de Cuergo) y toos salíen a la llucha faciendo ruíu con piedres y cencerros, intentando ganar terrén a los sos contrincantes.
El grupu de mozos que reculaba considerábase'l perdedor, lo que resultaba una deshonra pal so pueblu. Amás, los perdedores de La Porria yeren oxetu de les burlles de los neños de los pueblos vecinos que lo recordaben mientres el restu del añu.
La cita ye esti llunes a les 18.00 hores en Cuergo, onde s’entamará con una cencerrá, pa qu’una hora depués llegue la llucha ente los mozos de Cuergo y Coḷḷanzo, antroxaos col traxe tradicional de la Porria.
Efrén d'Andrés
