El Bloque solidarízase con Fai!

El Bloque por Asturies quier dar el so sofitu a Fai!, “pol secuestru de les instalaciones públiques pol equipu de gobiernu de Llanera, y pola represión llingüística que sufrieron”.

En concretu, citen la solicitú presentada en dos ocasiones; una en castellán, na que s’informó que nun había locales disponibles, y otra en asturianu, na que se refugó l’escritu por tar nesta llingua, “diendo d'esta manera en contra de la Llei d’usu”, señalen.
 
Dende'l Bloque consideren que les argumentaciones daes en dambos dos casos constitúin una falta de respetu y “demuestren como la corporación discrimina y marxina a los ciudadanos a los que representa”. “Nel casu de la solicitú n´asturianu, demuestren que los funcionarios desconocen les lleis que por cuenta'l cargu que desenvuelven teníen de conocer o bien, claramente tán incumpliendo la llei”, apunten.
 
La organización solidarízase con Fai! pola situación vivida y sofita la concentración que mañana sábadu organiza'l coleutivu soberanista a les 12.30 nes puertes de la Casa Conceyu de Llanera.