Centenares de persones piden la realmisión de Pepe El Ferreiro

Centenares de persones concentráronse énte Presidencia pa esixir la realmisión d'El Ferreiro. L'afeutáu agradeció l'apoyu, "que ye pal Muséu y pa tol patrimoniu asturianu".

La masa de participantes na concentración ocupaba buena parte de la esplanada asitiada ante l'edificiu presidencial. Ente los asistentes, taben persones de proyeición pública, como los ex diputaos d'IU-Ba-Verdes, Laura  González y Francisco Javier García Valledor, y el conceyal de Cultura del Ayuntamientu d'Uviéu, José Suárez-Arias Cachero. Valledor y Cachero recibieron con un aplausu a Naveiras, a la so llegada al actu, momentu nel que los asistentes entamaron a aplaudir.
  
"Sólo quiero dicir que gracies a tolos que tán equí porque nun sólo tán apoyando a Pepe El Ferreiro, tán apoyando al Muséu de Grandas y al patrimoniu asturianu, que ye lo importante", afirmó, p'añadir irónicamente: "tamién podemos dicir que'l patrimoniu ta salváu, como aquel setu que ta albentestate".
  
"Nun podía imaxinar esti apoyu, anque hai 35 años tuve l'apoyu de xente abondo que me dio pieces pa poder facer esti muséu y eso ye lo importante. Lo demás... si yo voi pasar, o si se ten que morrer d'algo, entós podo morrer d'ésta tamén'", acabó falando sarcásticamente n'eonaviegu.
  
Pela so parte, Ángel Prieto, voceru de la Plataforma qu'axunta a 135 colectivos en favor de la realmisión de Naveiras, criticó que "los motivos del Consorciu del Muséu pal cese nun son abondo", y señaló que la ciudadanía nun los acepta, exemplificando coles "firmes recoyíes, los más de 8.000 usuarios rexistraos en Facebook y les persones que vienen a esta convocatoria".
  
Pese a les declaraciones d'ayeri de la conseyera de Cultura, Mercedes Álvarez, dexando claro que la decisión "nun tenía vuelta p'atrás", Prieto señaló que "hai una estratexa marcada poles 135 entidaes de la plataforma". "Solicitó la realmisión formalmente y tán dándose como ferramientes el diálogu y el consensu p'algamala. Vamos siguir lluchando y revidinciando que Pepe deba tar al frente del muséu qu'ideó hai yá munchos años", acabó.