Espublizase “Díes d’iviernu”, ganador del “Llorienzu Novo Mier 2008”

El 25 de febreru preséntase en Candas “Díes d’iviernu” de Xurde Fernández, obra ganadora en 2008 del concursu de lliterariu de l'Academia “Llorienzu Novo Mier”.

La cita ye a les 20 hores, na Biblioteca Carlos González Posada de Candás, y na presentación intervendrán Carmen Dintén, responsable de la Biblioteca, Xosé Ramón Iglesias Cueva, miembru de númberu de l'Academia de la Llingua Asturiana y el propiu autor.
 
Xurde Fernández ñació en Candás en 1975 y ye llicenciáu en Filoloxía Hispánica y Especialista en Filoloxía Asturiana. Dedicase a la enseñanza, impartiendo les asignatures de Llingua Asturiana y Castellana y desendolcando al empar un llabor didáuticu y d’investigación que cuayó nel volume de materiales pa trabayar nel aula “A la gueta del material espardío”, asoleyáu pol CPR del Oriente y en collaboración con Marían García, y dos entregues de la «Coleición Toponimia», les parroquies carreñines de Candás (2002) y El Pieloro (2009), esta cabera de mancomún con David Fernández.
 
Como escritor ye una de les voces nueves del panorama lliterariu asturianu, entamando la so andadura xusto col principiu del sieglu. Con dellos poemes asoleyaos en "Letres Asturianes", "Lliteratura "y otres revistes. Xurde Fernández trabaya sobre too la estaya de la prosa y publicó “Volver” en 2007 y “El color del escaezu”, xunto con Marián García, y “La espera” en 2008. Ye asina mesmo ún de los autores antologaos en “Vía de serviciu” (2007).
 
“Díes d’iviernu”, ganadora del «Concursu de Creación Lliteraria Llorienzu Novo Mier» de l’Academia de la Llingua Asturiana na so edición del añu 2008, según señalen, la obra “ufiértanos un garapiellu de rellatos que conformen una paleta de claros y escuros onde personaxes ¿inventaos? caminen y viven llugares ¿reales? engarzaos nun collar dacuando afogadizu dacuando señaldosu onde’l denominador común ye l’espertar y l’enfrentase a la vida cada día”.