Asturies.com TV emite un adelantu de la entrevista a Berto Peña

Asturies.com TV ofrez un adelantu en videu de la entrevista a Alberto Álvarez Peña, que tolos llectores podrán lleer na so totalidá'l próximu sábadu.

Na entrevista de la que s’emite un adelantu, Berto Peña fala del trabayu del Coleutivu Belenos, de la situación política y la propia cultura del país. El sábadu podrán lleer tola entrevista, onde tamién falará de mitoloxía, l’Arribada, asociación que preside y d’otros munchos temes, amás d’afondar nos temes que trata nel videu.
 
Alberto Álvarez Peña (Salas, 1966) ye autor d’abondes obres de temática etnográfica n’especial sobre la mitoloxía y la tradición oral asturiana. Dende 1996 forma parte de la Fundación Belenos d’Estudios Etnográficos y del conseyu de redaición de la revista Asturies, editada por esta mesma fundación. Tien collaborao col Archivu de la Tradición oral del Muséu del Pueblu d’Asturies na recoyida de materiales pal Atlas Sonoru Llingüísticu del Principáu d’Asturies.
 
En Televisión Local Xixón dirixó’l programa “Marabayu”, de temática etnográfica, a lo llargo de 2008. Ye cofundador del cómic “El Llapiceru” y ún de los collaboradores del Salón del Cómic de Xixón. Ye’l presidente de l’Arribada, el más importante alcuentru lliterariu sobre la lliteratura na llingua del país.
 
Entrevista n'Asturies.com TV