Revueltes n'Irán nel aniversariu de la Revolución Islámica

Les fuercies de seguridá enfrentáronse colos grupos de la oposición con motivu de los actos celebraos en Teherán pa conmemorar el 31 aniversariu de la Revolución Islámica.

Los periodistes de medios estranxeros nun pudieron cubrir estos incidentes, ente  los que destaquen les agresiones al dirixente opositor Medhi Karoubi o al ex presidente Moahmed Jatamí, la detención d'una nieta del fundador de la República Islámica, ayatolá Ruholá Jomeini, o los supuestos disparos con fueu real efectuaos contra los partidarios del opositor Mir Hossein Musavi.
  
D'una parte, arrestaron a Zahra Eshraq, nieta del ayatolá Ruolá Jomeini, xunto col home, Mohamed Rez Jatamí, hermanu de Mohamed Jatamí. De la mesma manera, según la páxina d'Internet reformista Jaras, les fuerces de seguridá tamién detuvieron a un fíu de Mehdi Karoubi.
  
Primero, Jaras aseguró que les fuerces de seguridá iranís atacaren l'automóvil del propiu Mehdi Karubi, que "nun sufrió firíes graves", y a Mohamed Jatamí mientres participaben nes manifestaciones. De la mesma manera, otra páxina d'Internet de la oposición, Voz Verde, denunció que la Policía disparare con fueu real y llanzare gases llarimosos contra un grupu de partidarios de Musavi concentraos nel centru de Teherán.
  
Estes informaciones nun pudieron confirmase per otres fontes independientes porque a los periodistes que trabayaben pa medios estranxeros escoltáronlos hasta la Plaza Azadi, onde se celebraba la manifestación oficial, yá nun-yos permitió cubrir les concentraciones de la oposición.
  
La televisión estatal mostró imaxes de cientos de miles de persones, dalgunes d'elles con banderes iranianes y semeyes del líder supremu, ayatolá Alí Jamenei, dirixéndose haza la Plaza Azadi ('Llibertá'), nel centru de la ciudá.