La conseyera de Cultura diz que'l cese d'El Ferreiro "nun tien vuelta atrás"

Merdeces Álvarez dixo que la decisión de cesar a Pepe El Ferreiro ye firme y nun tien vuelta atrás. Señaló que'l cargu nun ye vitaliciu y que l'ex responsable nun s'axustaba a les normes.

Asina lo afirmó en declaraciones a los periodistes, tres la rueda de prensa de presentación del nuevu traductor al asturianu de la Universidá d'Uviéu. Al acabar l'actu, entrugáron-y pola concentración convocada pa esta tarde n'Uviéu, na que se va demandar la realmisión de Naveiras. "Esto nun tien vuelta atrás, ye una decisión firme y un ciclu nuevu al que vamos", señaló la conseyera.
 
"El cargu de director del muséu nun ye vitaliciu", añadió, pa esclariar qu'al so direutor naide quíta-y el méritu de facer nun momentu determináu esa colección d'esi muséu con tol so empeñu", pa lo que recordó que contó con fondos autonómicos: dende'l 2001 recibió una inversión de 1.600.000 euros.
  
"Ésa ye una cuestión y otra ye la forma de xestión, comentó, porque hai una serie de requisitos que-y pidíen dende'l Consorciu: contrataciones, llevar la contabilidá d'una forma determinada, respetu a los socios del consorciu, y un modelu de xestión que mos preocupaba".
  
Álvarez señaló que se "fizo asina porque nun se podía faer d'otra manera", dao que "l'actitú del direutor nun fixo posible una transición tranquila como n'otros sitios". Esplicó amás que se trata d'un cargu de confianza, y nos cargos de confianza sustitúise cuando nun se ta acordies con la so forma de xestión por mediu del consorciu. "Podía facese enantes o depués, pero nun ye'l casu. El consorciu ve que nun hai forma de qu'adopte eses normes que tou director del muséu tien que tener y toma esa decisión", añadió. Aseguró amás que se-y intentó ayudar "sucesivamente poniéndo-y una xestoría, pero foi inútil. Nengún direutor de muséu pue tar penriba de les normes de la llei, concluyó la conseyera".