La Compaña de Ronchel espubliza "El Fumiacu"

L’asociación maliaya La Compaña del Ronchel espubliza güei la quinta edición d’El Fumiacu, periódicu d'antroxu, "que busca la risa sobre temes llocales y d'actualidá”.

Con él quieren recuperase la tradición d'un grupu de xente de Villaviciosa conocíu por facer actividaes nestes feches, poro, utilicen una cabecera antigua de los años 30. Lo que pretende l'asociación ye recuperar esi espíritu folixeru y satíricu “qu’anguaño ta perdiéndose con esos antroxos de copia y pega que se festexen en toles villes y ciudaes”.
 
La tirada ye de 1500 exemplares, la mayoría tán repartiéndose por Villaviciosa y parroquies, pero tamién dalgunos van dir pa los conceyos vecinos de la Comarca la Sidra, y pa bares y llibreríes asturianistes d'Uviéu y Xixón.
 
La Compaña del Ronchel tien previstu un calendariu d'actividaes yá afitaes a lo llargo l'añu: pal Día del Llibru, el Día de les Lletres, L'Arribada, etc. Los oxetivos d'esta asociación maliaya son normalizar y fomentar l'usu de la llingua asturiana.