Los cabezaleros talibán nun pretenden negociar la paz

|

Los cabezaleros talibán afganos nun pretenden alcontrar una solución pacífica col Gobiernu de Hamid Karzai, según alvirtió'l ministru de Defensa británicu, Bob Ainsworth.

"Nun pienso qu'haya un deséu de reconciliación ente una mayoría aplastante de la clase dirixente talibán", estimó Ainsworth, que plantegó amás que los talibán sólo participarán na mesa de diálogu si la misión militar internacional y l'Exércitu afganu contiúen progresando na campaña ofensiva.

  
A la so vez, afirmó que si a lo último hai negociaciones, el Gobiernu afganu debe poder negociar dende una posición firme. "Nun pensamos que negocien con un enemigu dende una posición de debilidá", dixo Ainsworth.
  
Demientres la so comparecencia ante la Comisión de Defensa de la cámara de los Comunes, el ministru defendió'l polémicu programa de "reintegración y reconciliación" de Karzai y esplicó que'l so oxetivu ye "despegar" a los insurxentes que nun tán motivaos pola "axenda yihadista internacional" d'Al Qaeda, sinón por dificultaes económiques y de diferente índole.
  
Sobre esta nueva estratexa, negó que se trate d'un "sobornu" y precisó que se basa n'ofrecer oportunidaes enconómiques alternatives mediante trabayos, ente otres iniciatives. "Nun proponemos sobornar a la xente pa que dexe les sos armes y que vuelva garrales mañana", aseguró.
  
Ainsworth tamién faló de la nueva Operación Moshtarak, una campaña ofensiva nel centru de la provincia de Helmand na que van participar en total 40.000 efectivos militares, y esplicó que s'anunció d'antemano pa evitar el máximu númberu de baxes civiles. Ye importante "dar a la población la oportunidá de fuxir de los enfrentamientos antes de qu'éstos entamen", argumentó.
 

Contador Estadistiques