Ñaz el primer periódicu on-line español en llingua árabe

Ta acabantes de ñacer "Andalus Press", primer periódicu on-line d'información xeneral n'árabe dirixíu a la comunidá d'inmigrantes, sobre too marroquines, qu'usen esta llingua.

L'ex director de l'axencia de noticies marroquí MAP en Madrid y presidente de l'asociación de corresponsales estranxeros n'España (ACPE), el Said Ida Hassan, ye'l responsable y creador d'esti nuevu mediu de comunicación.  

Casi  un millón de persones falen árabe n'España. Sicasí, hasta agora nun existía "nengún mediu" dirixíu espresamente a esta comunidá, a diferencia d'otres nacionalidaes como la China que sí cuenta con periódicos na so llingua, polo que la "única opción" que los árabes falantes tienen ye ver cadenes de televisión, como Al Jazeera, qu'emiten al traviés de satélite nesi idioma, señaló'l periodista marroquí.
  
Pal creador de 'Andalus Press', que dirixe tamién una axencia de noticies televisives acabante de nacer en Madrid pa les cadenes de televisión árabes, "la inexistenica de medios y d'espacios onde los inmigrantes árabes y musulmanes n'España puean espresase llibremente nun facilita de nenguna manera la so integración na sociedá española".
  
"Trátase de crear un puente de comunicación ente España y el mundu árabe y islámicu, en vista del creciente interés de la opinión pública árabe y musulmana por esti país européu y por tolos de fala  hispana", señaló'l periodista, que tamién indicó que la versión dixital ye "un primer pasu", pero que nun se descarta, si la iniciativa tien una bona acoyida, llanzar un periódicu en papel.
  
El mediu ta formáu amás de pol propiu Said Ida Hassan, por un grupu de periodistes y universitarios árabes. La versión dixital del periódicu ya pue vese n'Internet y l'equipu ta preparando'l llanzamientu de la versión en castellán.
    
Amás, el periodista afirmó que tien la intención de "solicitar l'apoyu del gobiernu central d'España y tamién de los gobiernos autonómicos p'apoyar y facilitar la creación d'una radio pa la comunidá árabe".