Mazcaritos de toa Asturies van tomar Valdesoto esti sábadu

Los sidros de Valdesoto, los reixes de Valledor y Tormaleo, los zamarrones de Carreño y otros grupos, van participar esti sábadu nel desfile de les III Mazcaraes d'Iviernu de Valdesoto.

Ye l'actu col qu'acabarán estes terceres xornaes qu'entamarán yá'l vienres con una programación presentada ayeri nel Ayuntamientu de La Pola Siero.

El día 12 nel centru social de Lliceñes a les 19:30 hores, con una charra de Berto Álvarez Peña sobre "Aguilandos nos conceyos del Ocidente asturianu". De siguío, tendrá llugar la charra de Óscar Gonzalez sobre "Estructura de les Mazcaraes na Península Ibérica", na que van facer una comparanza entre mazcaraes de la Peninsula Ibérica y les d'Asturies. Dempues, Helder Ferreira y Bernardo Calvo van falamos del Volumen II de 'Máscara Ibérica' y pa finar habrá un alderique con informantes del Guirria y de Los Sidros.
  
El sábadu 13 de Febreru, entamamos dende'l Centru Social de Lliceñes a les 16:15 hores, faciendo un pasacais hasta la ilesia Valdesoto, onde se representarán 'La Modernidá' de Perge y representada polos escolinos de la Escuela de Faes (C.R.A. de Viella) 'Vaya traces de comedia', de José Ramón Oliva, y representada polos Sidros.
  
De siguío entamará un pasacais nel que tarán Os Reixes de Valledor, Os Reixes de Tormaleo, Vezos Astures, Grupu de Zamarrones de Carreño, el Grupu Teatru de Carbayín y los Sidros de Valdesoto, más toes aquelles persones que quieran mazcaritase al mou tradicional. Cuando acabe'l pasacais, habrá una merienda pa los que desfilen y una chocolatada, too ello acompañao de música del país.