Areces pide que la polítiques europees tengan en cuenta Asturies

Vicente Álvarez Areces pidió que la política de cohesión europea "nun s'oriente esclusivamente a los países con menor riqueza" porque ello perxudicaría a Asturies.

El presidente del Principáu señaló que si les polítiques de cohesión van pa los Estaos con menos riqueza, "amenorgaríense les posibilidaes d'acceder a fondos europeos pa rexones que como Asturies nun se consideren de converxencia". "Xugámonos muncho", dixo Areces en declaraciones a los medios na sede del Parlamentu Européu en Bruseles, que mañana acoyerá'l 83 plenu del Comité de les Rexones de la UE (CdR).
  
El CdR ye un órganu consultivu de les instituciones europees nel que "convién tar bien representán pa defender ante los poderes executivos los intereses d'España y d'Asturies", consideró Areces.
  
De cara a les perspectives financieres de la UE pal periodu 2013-2020, Areces dixo que "hai que tar mui atentos" y alertó del riesgu de que les polítiques de cohesión europees "s'orienten esclusivamente a los países recién llegaos, a los del Este, a los que menos riqueza tienen". Na so opinión, si ye asina, rexones como Asturies "evidentemente perderíen les posibilidaes de siguir converxendo y tener la posibilidá d'accesu a fondos europeos".
  
Nesti sen, apostó por introducir otros indicadores como, por exemplu, l'avieyamientu de la población, pa que'l PIB nun seya'l mididor "n'esclusiva", porque hai Estaos miembros que "entraron en converxencia, pero les sos rexones non".
  
Areces argumentó que por esta razón nun pue beneficiase "a los países más atrasaos y el restu fuera", sinón que l'oxetivu ha ser incluyir a "tolos" países comunitarios nes polítiques de cohesión, tovía "calcando" nes necesidaes de los menos favorecíos.