13 obres competirán nel sestu Festival de Cine Asturianu

Un total de nueve curtios y cuatro documentales competirán na sesta edición del Festival de Cine Asturianu qu'entama'l 22 de febreru, na gala de presentación na Biblioteca Xovellanos.

Según informó la organización del eventu, los nominaos nesti sestu Festival como meyores curtios nes categoríes de competición son 'Almas perdidas' (Julio de la Fuente, 2008), 'Carla' (Kiko y Javier Prada, 2008), 'El plan B' (José Bors, 2006), 'Estación de carretera' (Kiko y Javier Prada, 2009), 'Fémina domus' (Jaime Fernández, 2009), 'Sin cobertura' (Iñaki Ibisate, 2009), 'La vocación' (Xavi Vilareyo, 2009), 'Puntu' (Eva Gallego, 2009), 'Vencíu' (Santos Hevia, 2009). Como Meyores Documentales tán nominaos los trabayos: 'Bajar la música' (Martín-Parra-Otero, 2009), 'Conceyu de Valdés un llugar apasionante' (Hi-video, 2008), 'Pablo Maojo' (Rai García, 2009) y 'Tom Zé astronauta llibertáu' (Ígor Iglesias, 2009).

El Festival entamará'l llunes 22 cola presentación en Xixón de los nominaos, que tendrá llugar nel Salón d'Actos de la Biblioteca Xovellanos a partir de les siete la tarde. A les 19.30 proyectaráse una de les mítiques películes mudes del cine asturianu, 'Mieres del Camín' (Juan Díaz Quesada, 1927). A les 20.00 la tarde tendrá llugar la presentación del llibru 'Historia del Cine Asturianu', de Xaviel Vilareyo, nel mesmu llugar onde se proyectó cine la primer vez en Xixón nel añu 1896, nel llugar onde enantia s'allugó'l vieyu Teatru Xovellanos, que güei ocupa la Biblioteca Pública de la ciudá.
  
El día 23 nel Teatru Filarmónica d'Uviéu tendrán llugar les proyecciones, y el 24 la gala de pieslle y la entrega de premios nel mesmu escenariu, n'ambos casos a les seis de la tarde. L'asistencia a tolos actos del Festival de Cine Asturianu ye gratis. El Festival de Cine Asturianu concederá premios en delles categoríes, ente elles al Meyor Curtiumetraxe n'Asturianu y en Castellanu y a la Meyor Película. El festival remembrará'l centenariu de la película 'Día de fiesta en Candás', de Julio Peinado, y el centenariu del Cinema Versalles, el primeru construyíu en Xixón esclusivamente pal cine.