Uviéu, capital del teatru n’asturianu

El Festival Ciudá d’Uviéu de Teatru Amateur va acoyer nel Filarmónica una amuesa de catorce compañíes asturianes, de les que siete van facer teatru na llingua del país.

El ciclu, empobináu pola Federación de grupos de teatru amateur d’Asturies (Feteas) entamó’l pasáu 5 de febreru cola obra “Morrer d’amor” de la compañía A.A.C. Padre Coll.
 
Pero la primer cita col teatru faláu n’asturianu llega’l próximu xueves 11 de febreru, col Grupo de Teatro Rosario Trabanco, que pondrá n’escena “Tán repetíos” de José Ramón Oliva. Obra de marcáu calcáu calter costumista, onde la llegada d’un pariente que nun ven dende hai munchos años, vien a alteriar la monotonía de la vida de los vecinos y ponelo too pates arriba.
 
Un mes depués, el 11 de marzu, Syntexto Teatro pon n’escena “!Oh 36!” de Lluis Portal Hevia. Una hestoria, que surde de la esperiencia real que vivió'l médicu y escritor asturianu Carlos de la Concha na Guerra Civil y que cuenta la de tantes persones de d’estremada ideoloxía y nacionalidá que pasaron pela mesma vivencia traumática en metá de cualesquier guerra.
 
Al día siguiente, Telón de Fondo representa la versión n’asturianu de la obra de Brian Friel “El Xuegu de Yalta”, versión a la so vez del cuentu llargu de Chejov “La dama del perrín”. Yalta, llugar de veranéu de la Rusia zarista, ye l´escenariu d´un alcuentru ente dos persones; Ana Sergueyevna y Dmitry Gurov, dambos casaos y qu’entamarán una rellación adultera.
 
El 19 de marzu, el teatru costumista vuelve al Filarmónica de la mano d’A.C. Traslluz, que lleva a les tables “El Patrimoniu familiar” de Carmen Duarte. Na obra, nárrase como la muerte de Selmo fai qu’Ángeles, la protagonista, s’obsesione con facer un seguru de vida, camienta lo desprotexida que diba a quedar si morriera’l so home. La obra, al traviés del humor, fai una crítica a la desproteición de les muyeres viudes.
 
Mientres que’l 25 de marzu, el Grupo de Teatro de Carbayín va representar la obra de José Ramón Oliva Alonso, “La Texuca, República Independiente”, onde por un fallu burocráticu y una perda de documentación na guerra civil, una fastera de la Texuca (que llinda con cuatro conceyos asturianos) vese na posibilidá de dixebrase d’España y solicitar el so reconocimientu como nación soberana. Nel curtiu recorríu que va a tener esti proyectu de nación van pasar por dellos rexímenes de gobiernu, faciendo asina una sátira política con un ritmu modernu y anovador.
 
Al día siguiente, llega “L’encierru” de José Ramón López Menendez, a cargu de Teatro Kumen. La obra fala de les hores vivíes por unos sindicalistes-mineros dientro d’un pozu del valle del Nalón. L’enzarru faise col envís de forzar una negociación sindical cola empresa depués de dellos meses de fuelgues y movilizaciones y cuenta les rellaciones personales que surdieron ente los sindicalistes y de que mou la so cultura sindical condiciona les sos vides y les de los que tienen alredor.
 
Pa finar col teatru n’asturianu y coles propies xornaes, la Compañía Asturiana de Comedies, representa'l 27 de marzu, Día Mundial del Teatru, fuera de concursu la obra d’Arsenio González “La trastá”, una típica comedia costumista asturiana que busca la risa y la complicidá del espectador.
 
Toles funciones van ser nel Teatru Filarmónica, entamando a les 20.15 hores. Les llocalidaes tienen un preciu de tres euros, pudiéndose mercar nel Teatru Campoamorde 12 a 13:30 y de 16 a 20 hores, o nel propiu Filarmónica’l día de función a partir de les 18 hores.