Ferrín quier que l’Estáu subvencione la RAG

El presidente de la RAG, Méndez Ferrín, esixó a la Xunta de Galicia qu’asigne una cantidá fixa pa la institución, amás reivindicó’l sofitu económicu del Gobiernu español.

Xosé Luis Méndez Ferrín lleva reivindicando dende qu’asumió’l cargu un presupuestu añal afitáu nos presupuestos de la Xunta p’asina mantener el trabayu de la institución. Señalando les 29 persones en nómina que tien la Real Academia Galega y los “trabayos permanentes”, onde faló del diccionariu, les xeres terminolóxiques, la toponimia y la onomástica personal.

Unes necesidaes que l’escritor calcula en alredor de 1,2 millones d’euros añales. Amás, afirmó la necesidá de que’l Gobiernu español sofite económicamente a la RAG, yá que “tien drechu y asina debería ser”. Ferrín recordó que nel casu de l’Academia Vasca, reciben subvenciones del Gobiernu vascu y navarru, les diputaciones y el Ministeriu de Cultura de la República Francesa.
 
El casu asturianu
 
El presupuestu de l’Academia de la Llingua Asturiana pa esti 2010 ye de 230.000 euros, un 8% menos que l’añu anterior. Sicasí, na presentación de los presupuestos el pasáu avientu, la Conseyera de Cultura, Mercedes Álvarez, señaló que ye un presupuestu “que-y permitirá desendolcar tola so actividá con criterios d’aforru”.
 
Esa actividá son decenes de llibros de 26 coleiciones diferentes, les xornaes d’estudiu, concursos lliterarios, recoyida de material, los trabayos na gramática y los diccionarios, amás d’otros trabayos normativos, como’l recíen estrenáu Centru de Terminoloxía Asturiana.
 
Una de les mayores reivindicaciones de l’ALLA ye un llar social acordies cola importancia de la institución. Yá que na actual sede, un pisu na uviéina cai Marques de Santa Cruz, l’Academia nun tien espaciu pa una biblioteca y un depósitu de llibros. L’actual llar, estrenáu en 1983, diba ser, yá daquella, dalgo provisional a la espera de les tresferencies a la Conseyería de Cultura.
 
El total del presupuestu de la Conseyería de Cultura pa 2010 ye de 117,8 millones d’euros, 19,7% menos qu’en 2009. Y de cada diez euros d’esi presupuestu, ún va pal Centru Cultural Niemeyer d’Avilés, que dende’l Principáu cuenten abrir esti añu.