Pepe El Ferreiro sigue sumando apoyos

La Plataforma d’Apoyu a El Ferreiro convocó una concentración “en defensa de la cultura asturiana”. Mientres, súmense les amuese de sofitu dientro del asturianismu y del restu del Estáu.

La Plataforma, que yá axunta a casi 8.000 persones en Facebook, quier convocar la so primer concentración como entidá delantre de la sede de Presidencia, el próximu xueves 11 de febreru a les 19:30 hores. El llema ye “En defensa de Pepe El Ferreiro, por la defensa de la cultura asturiana”.
 
Mientres, un grupu de 60 espertos en patrimoniu etnográficu de toles partes del Estáu, roblaron un manifiestu de sofitu a Pepe El Ferrerio. Los firmantes recuerden que’l direutor del Muséu Etnográficu de Grandas de Salime caltuvo "con gran dignidá un muséu que foi  un modelu pa otros equipamientos d’esti tipu”.
 
Algamar súmase a les crítiques
 
El Grupu d’Opinión Algamar de Siero sumóse a les quexes pola “inxusticia cometida escontra Pepe El Ferreiro”. El grupu considera un ataque a los procedimientos democráticos y a la cultura patrimonial del Navia-Eo.
 
Algamar diz que talamente paez qu’ente “tantu muséu de cartón-piedra” a los responsables políticos de la Conseyería de Cultura nun-yos cuadraba’l llabor d’una persona que “mientres munchísimos años foi atropando y dignificando'l padremuñu cultural de la so zona”
 
Dende l’asociación de Siero, señalen que les disculpes son de lo más estrafalario, pero que les razones son evidentes: “imponer la so voluntá, reprimir la disidencia crítica y dexar claro que los museos y l’actividá cultural nun ha valir pa caltener y potenciar la cultura propia”.
 
Pa finar, comenten que dende’l Principáu pensaren que diba ser otru casu más de “deu mandón”, que yá naide-yos retruca, “pero esta vez nun vamos callar”, sentencien.