Decenes de palestinos firíos n'enfrentamientos cola Policía

Decenes de palestinos resultaron firíos mientres los enfrentamientos nel campu de refuxaos de Shufat, próximu a Xerusalén, depués de que la Policía israelina entrare nél.

Les fuercies hebrees diben proceder a detener a delles persones, según informa l'axencia palestina Maan, que precisa qu'ente los firíos hai periodistes.
  
Los incidentes entamaron cerca del control militar na entrada principal del campamentu, depués de que mozos palestinos llanzaren piedres y botelles vacíes a los axentes xudíos. Los soldaos respondieron llanzando gases llarimosos y granaes aturulladores y disparando bales recubiertes de goma, precisó l'axencia. Ente los firíos, según Maan, figura un cámara de la cadena Al Yazira, asina como tres soldaos israelinos que sufrieron firíes leves.
    
Hores enantes, les fuerces hebrees rexistraren los barrios d'As-Salam, Ras Jamis y Ras Shahada, del campamentu, asitiáu al norte de Xerusalén Este, y arrestaren a unos 60 palestinos vinculaos a Al Fatá y otros grupos. Demientres la redada, ficiérose rexistros casa por casa en busca d'armes.
  
Fontes policiales israelines citaes por Maan indicaron qu'once de los deteníos taben buscaos y precisaron que la operación continúa. El campu de refuxaos de Shufat acueye a más de 25.000 refuxaos palestinos.