Ñaz el Foru pola Lóxica Enerxética, "un frente común" pal norte del Estáu

Diferentes coleutivos crearon el Foru pola Lóxica Enerxética, cola intención de "facer frente común énte la irracionalidá ya illegalidá de bancos, eléctriques y alministraciones".

El so oxetivu ye aconceyar periódicamente y apoyar les actividaes que caún de los integrantes del órganu desarrollen. El Foru ta formáu por coleutivos d'Asturies, Cantabria, Lleón y País Vascu, que s'aconceyarón el pasáu día 30 na capital lleonesa.
 
El Foru esplicó que frente a esta política "que munches veces de manera irreversible define'l futuru del desarrollu enerxéticu n'España, la práctica totalidá de los más activos y potentes colectivos ciudadanos constituíos pa facer frente a tal situación na franxa norte del nuevu país decidieron constituuir un Foru Interrexonal pola Lóxica y la Llegalidá Enerxética".
  
Asina, los coleutivos ciudadanos integrantes decidieron "constituir un Foru de debate que s'aconceyará davezu col envís d'intercambiar conocimientos y esperiencies de toos ellos y adoptar acuerdos que valgan pa facer frente a la illegal y ilóxica actividá que güei preside la planificación y el desarrollu enerxéticu nel ámibtu territorial conxuntu de toos ellos, una amplia franxa del  norte d'España".
 
Apoyu concretu a la llucha d'ACA
  
Amás, acordaron "apoyar de manera xenérica y coleutiva les actividaes que desarrollen toos y caún de los colectivos nel ámbitu enerxéticu y, en concreto pa toos, la iniciativa de la plataforma ACA (Agrupación de Colectivos Asturianos), na direición de solicitar l'anulación parcial del Alcuerdu del Conseyu de Ministros d'España del 30 de mayu del 2008, pol que s'aprobaba'l 'Documentu de Planificación de los Sectores d'Electricidá y Gas. Horizonte 2008-2016'.
  
Asina, el próximu conceyu del Foru tendrá llugar a mediaos del presente mes n'Asturies, col fin d'apoyar esta iniciativa. Los firmantes son Agrupación de Vecinos y Amigos de Llanes (Avall), Asociación pa la Defensa del Cordal Cantábricu Picos de la Liebre y Agrupación Colectivos Asturianos (ACA, qu'inclúi 40 colectivos), per parte d'Asturies; Asociación Cántabra de Afectados por la Alta Tensión (Acaat), per parte de Cantabria; Movimiento Cívico contra la Sama-Velilla, por Lleón; y Izate, del País Vascu.