La educación n’asturianu ¿perdayuri?

El Principáu acaba de conmemorar diez años de tresferencies educatives. Asina, fixeron un repás de la década, onde en nengún puntu se faló de la situación del asturianu.

El Principáu acaba de conmemorar diez años de tresferencies educatives. Asina, fixeron un repás de la década, onde en nengún puntu se faló de la situación del asturianu.

Nuna rueda de prensa celebrada’l pasáu sábadu, el Conseyeru d’Educación, José Luis Iglesias Riopedre, foi numberando los llogros de los diez años de tresferencies educatives nel nuesu país.
 
Namás nun puntu de los apartaos de los que faló (infantil, primaria, secundaria, FP, teunoloxíes, artístiques, diversidá, apoyu educativu, billingüísmu y profesoráu), fixo mención a la esistencia d’una llingua propia y la so introducción nel sistema educativu.
 
Asina, nel apartáu dedicáu al apoyu n’aición educativa, Riopedre fixo referencia a los programes de biblioteques escolares, onde mentó’l proyeutu “Perdayuri Asturies”, “qu’intenta promover el conocimientu de la cultura asturiana y l’usu de la llingua asturiana o’l gallego-asturianu, y que llegó a más de 21.000 escolinos en 2007”.
 
Tamién se prestó atención al aumentu d’alumnos estranxeros, d’escolinos en programes billingües (n’inglés o francés), del presupuestu de la Universidá y de les nueves teunoloxíes o de la meyora de los programes de refuerciu. Pero nenguna referencia dende Educación a los 21.946 d’escolinos que deprenden la nuesa llingua nos colexos ya institutos nesti cursu 2009/2010.
 
Dalguna de les reivindicaciones históriques p’ameyorar l’enseñu de la nuesa llingua son que l’asturianu entame a enseñase na educación infantil, l’aniciu de procesos d’inmersión llingüística col asturianu como llingua vehicular y, pa finar, la convocatoria d’oposiciones de maestros d’asturianu, pa que los profesores tengan una plaza fixa, al igual que les otres materies. Reivindicaciones que nun dieron nengún reblagu y que tovía siguen vixentes depués de diez años con tresferencia de les competencies