Los ecoloxistes aleguen contra'l nuevu parque eólicu de Bual

La Coordinadora Ecoloxista d'Asturies denuncia que Bual va convertise nel conceyu con más parques eólicos, colos que tán funcionando y colos 14 previstos.

El proyeutu del Parque Eólicu Las Cruces La Bobia en Bual, prevé seis molinos de dos megawatios. Según informó la Coordinadora, esti parque eólicu ye ún de los 88 previstos nel occidente asturianu. Colo cual, l'impactu de toos ellos tien un efectu acumulativu, al qu'hai que sumar les llinies d'evacuación y les subestaciones eléctriques.
 
Según la coordinadora, esti conxuntu precisa sometese a la Evaluación d'Impactu Estructural qu'establez el Decretu Llexislativu polo que s'aprueba'l Testu Refundíu de les disposiciones llegales vixentes en materia d'ordenación del territoriu y urbanismu.
  
Señalen que'l parque eólicu va afeutar a abondos núcleos de población por proximidá, "polo que resulta evidente que tou esti conxuntu de parques debería sometese a una evaluación completa, d'acordies cola llei sobre evaluación de los efectos de determinaos planes y programes nel mediu ambiente".
  
Tamién esclarien que nun se pue inorar la probabilidá de colisión de les aves, y la modificación de la etoloxía pa les especies, "los parques eólicos suponen una perda de naturalidá". Na zona, les especies que s'identificaren son: siete mamíferos, 53 aves y trés anfibios.
  
Amás, falen de que va afeutar paisaxísticamente a la zona que s'alcuentra cerca del Llugar d'Interés Comunitariu (LIC) de la Cuenca del ríu Porcía. Yá que, según afirmen, hai que tener en cuenta que na proximidá preténdese la instalación d'otros parques na mesma zona, polo qu'hai que tener en cuenta l'impactu asociáu.
 
Señalen que'l fuerte impactu paisaxísticu que tienen estes instalaciones de torres de más de 80 metros d'altor, con pales de más de 45 metros de llargor. "Los aeroxeneradores pol so tamañu y pola so colocación nos conceyos de los montes tienen un enorme impactu visual y paisaxísticu y impacten sobre too en paisaxes naturales como son estos valles del occidente asturianu", afirmen.  
  
"Pa la colocación de los aeroxeneradores necesítase l'abertura de pistes d'un anchor paecíu al d'un cortafueos, pelos que pasen tráileres y grúes pa colocar los aeroxeneradores. Amás, necesiten d'esplanaes onde xirar los camiones y colocar les grúes", afiten pa finar.