RPA estrena "Batura", un microespaciu n’asturianu

La RPA estrena “Batura”, un microespaciu cultural n’asturianu presentáu por Vanessa Gutiérrez. Mientres qu’otros espacios onde usen l'idioma camuden el so horariu d'emisión.

 “Batura” va emitise de llunes a vienres a les 16.00, 17:00 y 18:00 con una duración de tres minutos caún. Los conteníos preséntense de forma monográfica a lo llargo de la selmana, de manera que se puean siguir de manera independiente o rellacionaos ente sí.
 
A la fin de la selmana conoceráse'l llugar d’Asturies nel qu’asoceden tolos temes trataos. Vanessa Gutiérrez planteará un xuegu al oyente pa qu’adivine cuála ye la ciudá o'l pueblu onde finalmente crúcense toles informaciones.
 
Batura tratará temes de la cultura popular y de diferentes manifestaciones artístiques: cine, lliteratura, pintura, música y arquitectura, ente otros. La gastronomía, la ciencia, la etnografía, la xeopolítica y la sociedá de diferentes llugares del mundu tamién tendrán llugar nesti espaciu.
 
Cambios nel restu de programación
 
Esti ye l´únicu espaciu que va tener como llingua vehicular l’asturianu de los estrenaos esti vienres 5 de febreru, que dende la RPA tomaron como puntu de partida d’una nueva etapa onde se refuercien los espacios d’actualidá y s’aumenten les hores d’informativos.
 
Sicasí, nun son los únicos cambios na programación n’asturianu de la RPA. Col estrenu nes mañanes del fin de selmana de “Al son de las cosas”, magazín presentáu y dirixida por Sonia Avellaneda, llugar onde s’emitíen los programes n’asturianu, la mayoría d’estos pasen a otra franxa horaria.
 
Asina, la programación n’asturianu nel fin de selmana entama a les nueve de la mañana de la mano de Xune Elipe, col so “Rockmería”, onde fai un repás pela conexón ente’l rock y la música tradicional. La siguiente cita cola llingua vien a les 14.00 hores, con “Nomes d’Asturies”, onde al estilu del vieyu teatru radiáu, se fai un repás pela vida y los fechos de los personaxes más importantes del país. Mientres qu’a les 16.00 hores, Ismael González Arias presenta “Música, músiques”, onde se pue sentir tola música de raigón tradicional del nuesu país.
 
El domingu, la cita col asturianu entama a les nueve, con “Llugarpalplacer”, onde Roberto Bernabeu pincha música etiquetada como alternativa. A les 14.00 hores Carlos Suari presenta “Acuto”, un programa deportivu centráu nes actividaes d’exerciciu física más propies del país. Mientres qu’a les 20.30 llega “Paraisu Natural” d’Antón García y a les 21.00 “Revoltixu nes Ondes” de Mari Lluz Pontón, los dos dedicaos a les entrevistes y l’actualidá y que se vuelven emitir el miércoles a partir de les 00.00 hores.