"Pieces" estrena'l sábadu la so cuarta temporada

TPA estrena esti sábadu seis de febreru la cuarta temporada del programa “Pieces”, presentáu por Vanessa Gutiérrez y ún de los pocos espacios n’asturianu de la canal pública.

Nel primer programa de la nueva temporada, el grupu La Tarrancha va presentar el so primer discu “Ö-3-3”, el dramaturgu Lluis Portal y el grupu de teatru Syntexto van facer lo mesmo cola obra “OH 36!”, mientres que l’editor de Trabe y la escritora Esther Prieto van presentar la nueva revista lliteraria Estoyu. El programa va pesllase con un homenaxe al músicu norteamericanu Vic Chesnutt, que morrió va poco.
 
El programa tien como oxetivu averar a los espectadores la cultura asturiana, tanto contemporánea como tradicional, teniendo como exe l’actualidá del arte n’Asturies y queriendo facer un archivu audiovisual de la cultura del país. Amás, “Pieces” a incorporar nesta edición la emisión itinerante.
 
Dirixíu pol cineasta y escritor Ramón Lluis Bande y presentáu pola periodista y escritora Ana Vanessa Gutiérrez, el programa emitió yá 93 capítulos dende’l 31 de marzu de 2007.