Aréstegui: “El Gobiernu asturianu manifiesta debilidá llingüística”

Pal diputáu popular el Gobiernu asturianu manifiesta debilidá llingüística frente al gallegu, anque afirmó que’l so partíu refuga la oficialidá, declaraciones que yá foron contestaes pol CAO.

El Partíu Popular, al traviés de Joaquín Aréstegui, camienta que les declaraciones del presidente de la Real Academia Galega, Xosé Luis Méndez Ferrín, vienen pola “debilidá llingüística que manifiesta’l Gobiernu asturianu”.
 
Sicasí, Aréstegui dixo que’l so partíu nun ye partidariu de la oficialidá, sinón d’una “preservación de la llingua de cada zona”. Amás, pidieron que na próxima cumbre astur-galaica, los dos gobiernos traten la cuestión llingüística del Navia-Eo.
 
Pallabres que yá foron criticaes pol Conceyu Abiertu pola Oficialidá, que considera estes declaraciones como “una amuesa de cinismu ya inorancia al empar”. Señalen que pa la preservación de les llingües ye fundamental el respetu pa los drechos de los falantes, “y esto llógrase al traviés de la declaración d’oficialidá”.