El Garrapiellu y Foru Arte Ciudá sofiten a Pepe el Ferreiro

El Garrapiellu y el Foru Arte Ciudá vienen d’amosar el so sofitu al fundador del Muséu de Grandas y piden la so restitución, “énte esta amuesa de despreciu de la cultura asturiana”.

Pa la Tertulia Cultural El Garrapiellu “ye una ruindá atacar a la persona que fundó esti muséu, dotólu de material y trabayó tantos años hasta algamar l’ésitu de visitantes qu’agora tien”, señaló Tino Lozano en nome de la Xunta Direutiva de l’Asociación.
 
El Garrapiellu camienta que paez que se quier acabar cola cultura etnográfica, patrimonial o ambiental d’Asturies, “si tienen dalgún problema sicolóxicu cola llingua o la cultura asturiana debíen facéselo tratar, porque son preocupantes estes actitudes caciquiles que desprecien el bon nome de les persones y la llibertá de la sociedá civil, mientres premien la burocracia y l’actitú servil”.
 
El Garrapiellu desixe la restitución nel cargu de Pepe el Ferreiro y la dimisión de los responsables d’esti “ataque a la cultura asturiana”.
 
Mientres que’l Foru Arte Ciudá pidió la so restitución nel cargu y denunció “la falta de tresparencia al nomar a deu un sustitutu pa una plaza que nun sal a concursu públicu”. Pal Foru Arte Ciudá ye un bon exemplu del “camín antidemocráticu que siguen los responsables culturales de la nuestra autonomía, que desprecien el conxuntu de les artes y la cultura d’Asturies”.