Preséntase’l Centru de Terminoloxía Asturiana (TERMAST)

Manaña xueves a les 12 hores preséntase nel Hotel Principado d’Uviéu'l centru TERMAST, una nueva ferramienta pa que los usuarios vayan proponiendo y aceptando términos n'asturianu.

TERMAST ye’l centru on-line encargáu de la coordinación xeneral de les xeres terminolóxiques n’asturianu y surdió en xineru de 2009 al traviés d’una inciciativa de l’Academia de la Llingua, el Colexu d’Inxenieros n’Informática del Principáu y el coleutivu Softastur.
 
L’oxetivu de TERMAST ye proponer nuevos elementos terminolóxicos en llingua asturiana pa facer d’esti idioma una ferramienta afayadiza y útil nuna sociedá cada vegada más tecnificada ya interconectada.
 
El trabayu del centru surde al traviés d’iniciatives individuales o grupales concretes que dean a la conocencia pública la so propuesta de solución a los problemes terminolóxicos del asturianu nos estremaos contestos comunicativos, (científicu, nueves teunoloxíes, economia, socioloxía, humanística...).
 
Estes propuestes tarán al algame de los usuarios pa que seyan éstos los que vayan dando calter de normalidá, de mou que llueu d’ello l’Academia puea dir inxiriéndolos dientro de los sos calces normativos.
 
A lo llargo de la presentación fairáse una demostración práutica del funcionamientu d’esti nuevu centru de terminoloxía, que yá cuenta na so web con una propuesta de terminoloxía económica y empresarial.