Una decena de deteníos nuna operación contra los Boixos Nois

Los Mossos d'Esquadra detuvieron a ente diez y doce inviduos dientro de la operación que desarrollaron en Barcelona contra los Casuals, la estaya más violenta de los Boixos Nois.

Según informaron fontes cercanes al casu, ente los deteníos ta'l dirixente de los "Casuals", Antonio Torn Albarracín "Antoñito", al qu'un xulgáu de Vic acusó de tar implicáu nun casu d'amenaces de muerte al presidente del FC Barclona, Joan Laporta. Esta detención tovía nun la confirmó la policía catalana.
  
Según fontes xudiciales, un xulgáu de Gavà ta investigando a un grupu organizáu pa cometer amenaces, sobornos, lesiones y tráficu de drogues. En total realizáronse 15 rexistros en llocales, viviendes, aparcamientos y bares, y la mayoría d'ellos acabaron sobre les 14 hores.
 
Cuatro d'ellos fueron en Barcelona y el restu en puntos como la cai Riera Blanca de L'Hospitalet, Laureà Miró de Sant Feliu y de Llobregat, Jaume I y Doctor Fleming de Catelldefels, Camí Ral de Esparregera y en Sant Boi, ente otros.
  
El casu, que ta en secretu de sumariu, depende del Xulgáu d'Instrucción númberu 3 de Gavà, y la operación ta desarrollándola la Unidá Central de Secuestros y Estorsiones de la Divisón d'Investigación Criminal (DIC).
  
Na cai Riera Blanca, los Mossos entraron nuna tienda de ropa xunto a dos persones. Una trabayadora d'un restaurante cercanu mostró la so "sorpresa" cola operación y dixo que les persones que xestionen la tienda son "normales" y qu'avecen a dir comer ellí.
  
En declaraciones a Europa Press, otru vecín, sicasí, nun se mostró sorprendíu y afirmó: "ye lo qu'hai". Enteráu de la noticia pelos medios, recordó que los díes de partíu los Boixos Nois "armen xaréu" y "prenden bengales" nes cercaníes.
  
Nel pisu rexistráu na cai Laureà Miró de Sant Feliu, los Mossos atoparon una máquina de prensar, una barra fierru, bolses y una caxa con material diversu.