Desalcuerdu nel gobiernu pola incineradora

|

Ana Rosa Migoya dixo que la decisión sobre la incineradora yá taba tomada “y nun hai que dar más vueltes”. Sicasí, el Bloque recordó-y qu’esi tema nun entra nel pautu de gobiernu.

La conseyera d'Alministraciones Públiques y Vocera del Gobiernu, Ana Rosa Migoya, afirmó que la decisión del Executivu sobre la construcción de la incineradora ye "perfeutamente conocida y yá s’aldericó y esplicó abondo". Anque esclarió que l’asuntu nun se faló na sesión del Conseyu de Gobiernu de güei.
 
Sicasí, el Bloque por Asturies quier recorda-y a Ana Rosa Migoya’l pautu de gobiernu, “que diz que nun hai incineradora”, y qu’ella ye la vocera del Principáu, “non de la FSA”.
 
Según señalaron, el Bloque nun acaba d’esplicase l’actitú “irresponsable” de la vocera del gobiernu coles sos declaraciones. Afirmen que Migoya “tal paez que vive nun mundu paralelu a la realidá”, yá que ye la vocera del gobiernu asturianu y “non la delegada de clase de la FSA”.
 
Esclarien que’l Gobiernu nun tomó nenguna decisión porque los puntos de vista dientro son opuestos y “si precisamente nun se trató nel Conseyu de Gobiernu ye porque ta claro abondo nel pautu ente les organizaciones”.
 
El Bloque diz que cola incineración lo qu’hai que dar son argumentos, “non voces”. “La incineradora seguramente seya un bon negociu pa unos pocos, pero non una necesidá pa la sociedá asturiana, porque ta en xuegu la salú de los sos ciudadanos y ciudadanes”, sentencien.

Comentarios

Munchu  ruxiu y mas nada non!!yeso  fai el Bloque , non poden dexar el duernu, que ye una vida bona..Con previlexios ,nun ye Estrañu que'l  PSA faiga  lo yos da'l  gana.
Vamos de pena ,ye tan dificil facer politica p' Asturies??Nun se pode dexar el  Pautu???

Contador Estadistiques