Seis presos políticos saḥarauis en fuelga de fame

Los seis presos políticos saḥarauis deteníos por Marruecos el pasáu mes d'ochobre entamará esti xueves una fuelga de fame de 48 hores pa protestar poles sos condiciones de reclusión.

Los presos denuncien que sufren malos tratos na prisión de Salé, onde s'alcuentren deteníos, según informó esti martes nun comunicáu'l Colectivu de Defensores Saḥarauis de los Drechos Humanos (Codesa).
  
Alí Salem Tamek, Brahim Dahane, Ahmed Nasiri, Iahadin Tarruzi, Saleh Lebuihi y Rachid Asaguira, a los que les autoridaes marroquís detuvieron el pasáu 8 d'ochobre, "entamarán una fuelga de fame d'alvertencia por un periodu de 48 hores de magar el xueves 4 de febreru", reza'l comunicáu.
  
L'oxetivu de la fuelga ye protestar "énte la denigrante situación y los malos tratos de que son víctimes per parte de l'alministración de la prisión, en coordinación directa cola delegación de la Direición Xeneral de Prisiones y colos servicios d'intelixencia marroquinos".
  
Los seis activistes saḥarauis denuncien que dende la so detención "procedieron al so aislamientu del mundu esterior, desatendiéndoles con indiferencia a pesar del deterioru de la so salú y confinándolos nes celdes de castigu".
 
Amás, según Codesa, privóse a los seis presos "de la llectura de prensa, d'escuchar y ver noticies per radio y televisión, de visites directes y del contactu per teléfonu colos sos families y abogaos". Tampoco se-yos permite, según esta organización, "tomar los medicamentos que necesiten dalgunos d'ellos".
  
"Ésta ye la primer vez que los seis presos políticos saḥarauis realicen esti tipu de güelga de fame d'alvertencia nesta prisión na que l'alministración sigue negándose a atender los xustos y llexítimos pidimientos de los deteníos y les sos families, qu'amás viaxen cientos de kilómetros esponiéndose a abondos problemes", acaba'l testu.