Señalen la necesidá d'esportar gochu celta al mercáu español

El presidente de la Federación de Comerciu señaló la "necesidá de comerciantes" pa esportar los nuesos productos gastronómicos, que "tán bien vistos pero nun se conocen" .

Severino García Zaragoza dixo esto na presentación de les xornaes del "Samartín del Gochu Celta", organizaes poles sidreríes Tierra Astur y les tiendes Crivencar. L'actu foi presentáu pol direutor gastronómicu de la entidá, Lluis Nel Estrada, y ún de los criadores y productores de la especie, Iván Rodríguez Amado.
 
García Zaragoza camentó qu'hai pocos conocedores de los quesos asturianos o que les casadielles nun son conocíes fuera d'Asturies, "falta comercialización, pues tener la meyor idea del mundu, pero como nun la sepas vender tas muertu", señaló.
 
Dende'l so puntu de vista, el fechu de que "surda Crivencar y otres cadenes de supermercaos que prestixen los productos asturianos, que los meyoren, que superen la ellaboración, qu'enseñen a los productores a producilos apropiadamente, ye lo que verdaderamente vien a realizar esi llabor, que ye del que más falta había".
  
Recordó tamién que "la comercialización agora ta montada de manera que se puea abastecer a otres rexones, como por exemplu'l xamón d'Estremadura, qu'entró nel mercáu comiéndo-y una parte del terrenu al xamón andaluz". "¿Por qué nun vamos poder nosotros entrar con calidá y con productu xenuín, con una crianza ecolóxica y de calidá?", entrugó pa recordar que "necesitamos comerciantes, espertos en comerciu, porque salir a vender ye imprescindible".
  
Mostróse "convencíu" de que "hai güecu" nel mercáu pal gochu celta. Señaló l'exemplu del xamón de Guijuelo, en Salamanca. "Llévenmos munchos años pero en dalgún momentu entamaron", comentó. Na so opinión, los productos asturianos "dalgún día llegarán a una cifra razonables y si asina llegamos a 2.000 emplegos ye un pasu".
  
Consideró que "tolos productos curaos" del 'gochu celta' puen tener buena salida, asina como los callos asturianos, "que fueron famosísimos y güei tán produciéndose nel estranxeru".
  
Pela so parte, Lluis Nel Estrada destacó la recuperación nos últimos años del gochu celta y punxo como exemplu les sestes xornaes gastronómiques que güei entamen nes sos sidreríes, y que se prollongarán hasta'l próximu domingu. "Hai unos años esto nun podía ser, porque nun había xéneru, nun había ganáu. Güei, col pasu de los años, Tierra Astur sigue organizándoles", comentó.
 
L'asociación de criadores nun apoya les xornaes
  
Destacó la calidá de la carne que xenera esti animal, asina como'l llabor de los productores, participando nel actu cuatro d'ellos. Sicasí, matizó que l'Asociación de Criadores nun apoya estes xornaes, cuando sí apoyó otres actividaes asemeyaes, y afirmó nun conocer el motivu d'actitú tala.
  
Pela so parte, Iván Rodríguez señaló la importancia pa la cultura asturiana y pa l'alimentación de los habitantes d'esta comunidá que tuvo'l gochu celta y alertó que tovía cuerre peligru de desapaición. Señaló que la so carne axunta trés tipos de calidá: la del sabor, la de la salú y la económica, esclariando que "la única rentabilidá d'esta raza ye si se cría de manera ecolóxica y estensiva, nunca enxaulada".
  
El "Samartín del Gochu Celta" de Tierra Astur ofrez un menú degustación consistente en sopa de fégadu con pan d'escanda, pote de berces, picadillu con güevos, adobu con pataques y mazanes asaes a un preciu de 20 euros, amás de vinu de la tierra de Cangas o sidra y café o llicor asturianu. Amás, dispondráse d'una carta con dellos productos, como'l llacón cocíu, el cachopu rellenu de setes y quesu de La Peral, el xamón asáu o les chuletes. Na carnicería Crivencar de la cai Santa Susana d'Uviéu tamién se pon a la venta carne de 'gochu celta'.