Buendía diz que'l sistema 'antineveros' en San Isidro "nun falló" y anuncia otra fase pa reforzar la seguridá

El conseyeru de Mediu Ambiente, Ordenación del Territoriu y Infraestructures, Francisco González Buendía, afirmó güei que l'actuación 'antineveros' que se desarrolló na carretera AS-253 ente Cabanaquinta y San Isidro ye "eficaz" y "nun falló" a pesar de los últimos sucesos na zona.

En tou casu, Buendía dixo que ta previsto executar una segunda fase pa reforzar les barreres contra los argayos de nieves que contemplen "viseres" en puntos concretos de la zona. Buendía fizo estes manifestaciones nel Plenu de la Xunta Xeneral del Principáu d'Asturies, onde'l diputáu del PP, Alfonso Román López, entrugó-y pola seguridá nes carreteres d'accesu a San Isidro pela parte asturiana, tres los últimos argayos rexistraos por mor de la nieve nel qu'una familia de Mieres llegó a quedar atrapada por ún de los desprendimientos.

Román López dixo que les midíes del Principáu "fracasaron" y que la situación supón un "peligru" pa los usuarios. Asina, reclamó a Buendía que confirme y execute otru tipu de midíes como la instalación d'un falsu túnel. "Nun hubo desgracies personales de milagru", apuntó'l diputáu del PP, que tamién tuvo crítiques pa la respuesta del 112-Asturies nel sucesu de la familia de Mieres.

Sin embargu, Buendía negó que fallare'l sistema y recordó que s'invirtieron casi un millón d'euros, cola instalación de barreres flexibles a un altor de 2,50 metros na zona onde se xeneren los ádenes. Según Buendía, esi ye'l sistema que se seleccionó per parte de los técnicos.

Según informó la Conseyería, les obres se paralizaron en delles ocasiones por condiciones medioambientales previstes nel Estudiu d'Impautu Ambiental, como la presencia del águila real na zona o la dureza del iviernu qu'obligó a retrasar dalgunos de los trabayos por cuestiones de seguridá.